م الآخر| والإسم جامعة!

على إحدى القنوات وانت بتسمع آخر الأخبار والتحليلات، أن آخر إحصائية لعدد القنابل التي تم العثور عليها وإبطال مفعولها داخل جامعة عين شمس مثلًا 19 قنبلة، وأن جامعة القاهرة عثر بداخلها على 23 قنبلة يبقى ده اسمه ايه؟.
جامعة ايه اللي كل يوم نلاقي جواها قنابل؟! جامعة ايه اللي يموت عندها كل يوم شهيد مناضل؟!، طيب نفكر كده إنها فعلًا جامعة يعني مثلًا أستاذتها وعلمائها ومثقفيها يعملوا ندوة، يجمعوا فيها شبابها وبناتها يتكلموا فيها معاهم ع اللي حصل واللي بيحصل واللي هيحصل، يسمعوا منهم يعرفوا ايه اللي حصل لشبابها،
يعني يا سيدي بدل ما تطلع على الفضائية تناظر وتعترض على دخول الشرطة وتقول مناظر، ويتقال عليك بعدها زعيم مناضل ضد القمع والظلم والقهر للطلاب.
طيب فكرت أنك تسمع الطلاب، تجمع الطلاب، تفهم الطلاب، توعيهم، دورك يا سيدي ان تكون شمعة وعقل ومنار تشع علم وثقافة وأدب وحضارة، مين اللي قال إن دورك إنك تطلع علينا وتقول ده هزار، وتقول أصل ده شباب غاضب ليل نهار سيبه يعبر يمكن يتحول الجد لهزار، أرجوك يا سيدي اعرف إن الَجد عمره ما هيتحول لهزار.. الَجد عند المندس بينهم بيتحول لدم ودمار، فأرجوك يا سيدي اتعامل معاه على إنه جد مش هزار، ولأنها جامعة يعني محتاجة تجمع كل طالب وكل أب وكل أم وكل أخ وكل دار تجمعهم على كلمة حب لبلد هيا "مصر" لازم تعيش وتقف ثابتة مشعة زي شمس النهار.
وأخيرًا إلى سيدي أرجوا فعلًا أن تقوم الجامعات كلها بالسماح بدخول الشرطة إلى حرمها؛ لحماية المنشآت والطلاب أنفسهم، وأن تقوم كذلك الجامعة على تنظيم ندوات ومؤتمرات داخل وخارج الجامعة لمعرفة مشاكل الطلاب، وتوضيح الصورة الأمنية والاقتصادية والسياسية لهم، وأن تقوموا باستضافة أصحاب الشأن ليتكلم كلًا في مجاله، ليكون الكلام من أصحاب تخصصه وليعبر كل عن رأيه في إطار من الحوار والاحترام المتبادل، ولكي نضمن استمرار الدراسة.. يعني حتى تتطور!.