الدفاية كادت تقتلها.. بسمة وهبة تكشف كواليس نجاة منزلها من حريق: كنت هعمل كارثة

كشفت الإعلامية بسمة وهبة، كواليس حريق منزلها أمس، وقامت بعرض المشترك الخاص بدفايتها على الهواء، حيث ذكر ت أنها منذ أسبوعين تقريبًا وخاصة بعد وفاة والد الفنان إيهاب توفيق، نصحت المشاهدين بضرورة الحذر من استخدام الدفاية وأخطارها، وظلت تتحدث عن طرق استخدامها وكيفية اختيار الدفاية الجيدة، وشددت في الوقت ذاته على أهمية المشترك، "نصحت غيري ونسيت نفسي".
وأضافت "وهبة"، خلال تقديمها برنامج "كل يوم"، على شاشة "on e"، أنها اكتوت بنار المشترك والدفاية، حيث كانت تظن أن المشترك الخاص بها مستورد وهذا يعني حالته جيدة ولن يُسبب حرائق، ولكن "واضح إن الرقابة بعافية شوية" على حد وصفها، مضيفة: "يوم ما اتكلمت عن الدفاية عملت نفسي تلميذة وشاطرة وقولت في البيت هاتوا لي بلاطة سيراميك تحت الدفاية عشان منحطش خشب زي ما قالوا".
وتابعت: "دخلت أنام وسبت الدفاية اللي في غرفة النوم شغالة، قلقت من النوم على صوت حاجة بطق، النوم سلطان ممكن حد ميقلقش بس الحمد لله إني قلقت، فتحت عيني لاقيت نور، قولت مين فتح النور في الأوضة وأحنا نايمين، افتكرت حد ولع النور، لاقيت مش نور دي حريقة ونار ولعة، جريت بسرعة أشوف اية ده وافتكرت إني بحلم".
وواصلت: "لاقيت سلك المشترك سايح ومولع والنار طالعة منه وحارقة في الأرض حواليا، الحمد لله جوزي صحي هو كمان وجرينا عشان نطفيها، روحت أجيب مياه، لاقيت نفسي بعمل كارثة، بس جوزي جاب فوط وبشاكير وطفى الحريق، عرفت أن القطن بيكتم الحريق".