"حسام" وأصدقاؤه يحتفلون: "إحنا شباب السيسي"

على أصوات الأغاني الوطنية، وإطلاق الألعاب النارية في سماء منطقة زهراء المعادي، احتفل مجموعة من الشباب، عقب إعلان المشير السيسي ترشحه لرئاسة الجمهورية، "نزلت انا واخويا وفضلنا نكلم أصحابنا عشان نتجمع ونحتفل بالخبر اللي فضلنا نستناه كتير"، قالها حسام أحمد، أحد شباب المنطقة، مضيفًا " بابا كان رافض يخليني انزل عشان كان الوقت اتأخر وعندي مدرسة تاني يوم، بس انا فضلت اقنعه لحد ما نزلته معايا عشان يفرح وسطنا والناس كلها تتشجع وتنزل لينا في الشارع".
وقف الشاب الذي اتم عامه السابع عشر، أمام منزله محاولاً إقناع أهالي المنطقة بالنزول "الناس كانت طالعة من البالكونات وبتتفرج علينا وهما مبسوطين، فحاولت اقنعهم انهم ينزلوا معانا وفعلاً نزل شباب كتيرة وشاركونا فرحتنا، عشان شايفين ان الامل جاي بكره وكل حاجة هتبقى في البلد تمام التمام بس المهم احنا نساعده".
وأضاف "حسام": "لما طلعنا على أول الشارع لقينا صوت الخطاب بتاع السيسي عمال يشتغل كل ما يخلص، واكتشفنا إن والدة "إبراهيم" صاحبنا هي اللي عماله تعيدوا من كتر ما هي فرحانة، ونزلت بنفسها وزعت علينا شكولاته، وقالت لينا دي عشان خاطر السيسي والمرة الجاية هوزعها لما تنجحوا السنادي"، مشيراً "أنا وكل اصحابي كنا متأكدين إن السيسي هيترشح عشان الناس كلها بتحبه، وبابا دايمًا يقولي إنه بطل زي السادات وعشان كده أنا بحبه، وقررنا إننا نتصور في اللحظة دي ونزلها على "الفيس بوك" عشان أي حد من الإخوان يقول ان مفيش حد نزل وإنها فوتوشوب، نقولوا احنا شباب السيسي يا سيدي".