م الآخر| ليه أحب مصر؟.. علشان الفيزا يا باشا

طب أنا بقالي كم سنة بفكر في السؤال ده....هو المواطن المصري ليه يحب مصر؟ هو إيه الحاجة اللي بتخلي الشخص يحب بلده وينتمي ليها أصلا؟.
1- هل انت بتحب بلدك عشان بتحب الحاكم مثلا؟.
-لأ، لأن وقت الثورات على الأنظمة وكره الحاكم، الناس بيدفعها حبها للبلد نفسها.
2- طب هل مثلا الواحد بيحب بلده عشان ياما قدمتله وجمايلها مغرقاه من يوم ما وعي على الدنيا؟.
-الصراحة، أنا متحطتش في الموقف ده عشان أعرف أجاوب، ممكن أستعين بصديق من بلاد بره؟.
3- أمممم، طب حتى لو الحاكم زبالة والحالة ضنك من زمان، أكيد برضه الشعب شبه بعضه، كله عايز تغيير وكده وبيشجعوا بعضهم على التحسن والتقدم والكلام بتاع مواضيع التعبير ده.. الشعب كله على قلب رجل واحد يعني؟.
-لأ، هو أنا الصراحة عمري ما قابلت الراجل داهون، محصليش الشرف.
4- طب بص، حتى لو البلد عمرها ما قدمتلك حاجة والدنيا بايظة خالص والشعب مش شبهك، أكيد مثلاً لما بتصحى تروح الشغل بتحس إنك بتعمل حاجة إيجابية عشان تساهم في تغيير البلد.. أكيد ده إحساس حلو أوي، صح؟
-أصحى أروح فين سعادتك؟.
5- طب يبقى أكيد خايف تسيبها عشان العادات والتقاليد اللي فيها.. احنا في الأول وفي الآخر شعب متدين برضه ودي حاجة مش سهل تلاقيها اليومين دول.
- هو أنا مش لاقيها فعلا، دي حقيقة.
6- بس.. يبقى هو الفن: أصل الفن ده هو مرآة الوطن....أكيد سبب تمسكك بالبلد دي هو ازاي فنها بيعبر عنك وعن معاناتك وبيحاول دايما يرتقي بمستوى الشعب...احكيلي كده ايه آخر فيلم شفته؟.
- فيلم "قلب الأسد" للمبدع محمد رمضان.
7- خلاص، أنا فهمتك!، انت أكيد مش عايز تسيبها عشان خايف تتمرمط بره.. مفيش برضه زي إحساس الواحد في بلده كده، وهو مرفوع الرأس، صح؟.
- صح يا باشا، هو أنا ياما اترفعت الصراحة.
8- طب يا ابني أومال إيه؟ إيه بس اللي مصبرك على دي بلد؟ يعني نظام ومفيش، شعب ومش عاجب، شغل ومش لاقي، تدين ومش موجود، فن ومش متوفر، كرامة وفي الأرض.. أومال إيه يا عم اللي مصبرك؟
-الفيزا يا باشا...و هو فيه غيرها؟.