م الآخر| جرب كدة.. هايحصل إيه يعني؟

هايحصل أيه يعني لما نقوم كل يوم الفجرية الساعة 6 كدة قبل الشروق، نلحق الفجر حاضر، ونصلي ركعتين ضحى. ونتصبح بصوت المنشاوي أو محمد رفعت.. أو حتى العجمي.. ونروق أوضتنا ونلبس وننزل نمشي ساعة رياضة ونرجع على مشاغلنا، ويبدأ يومنا مليان بركة ونور وطاقة.
هايحصل أيه لو عدينا على أوضة ماما وبابا، و"بوسنا" إيد كل واحد فيهم، وطلبنا منهم دعوة حلوة من القلب ولا مية دعوة تساوي بتاعتهم، ونبطل نقول كبرنا على الكلام ده.
هايحصل أيه لو مشينا في الشارع بنضحك، أو على الأقل مبتسمين، ومانقولش إيه الهبل اللي على الصبح ده.. ونضحك في وش مخاليق ربنا.. وياسلام لو طفلة أحلى من نور الشمس قابلتك.. يضحكلك يومك بضحكتها هي قبل كل البشر.
فيها أيه لو نمشي بكيس مليان "بون بوني، ومصاصات، ولبان، وجيلي كولا" ومانشوفش طفل غير وحاجة من دول تكون سبب بسمته.. فقير بقى مرتاح ماتكونش قصتك.. المهم فرحتك ساعتها بفرحته.. ماتضيعاش بيها أكيد كسبان.
وفيها أيه لو كان نظام الصدقة أسلوب حياة.. آه أسلوب حياة زي الإصطباحة كدة.. أو زي "استيتس" كل يوم الصبح بتصبح فيه على صحابك "صباح الخير يابشر".. وأول محتاج تقابله يطلع من جيبك اللي يطلع ويكون نصيبه.. إن شاالله جنيه كل يوم.. إن شالله بسمة رضا في وشه.. تحسسه إنه زيك موجود في الدنيا.
فيها إيه لو بنفس المبدأ، لما تفطر الصبح من أكلك أعمل ساندوتش زيادة وفطر معاك جعان.. يمكن يكون بقاله يومين مأكلش.. ويمكن لسة بيدور في صناديق الزبالة على أي حاجة باقية منك.
هايحصل أيه يعني لما تحب خطيبتك قوي وعبر بكل مشاعرك عن شوقك ليها، من غير ماتفكر كل شوية ولا تشغل بالك هاتمسك إيدها إمتى، وقد أيه في مدة ارتباطتكو.. وتبطل تزعل لما تقولك أحسن بلاش..ولما تقولك عشان ربنا مايزعلش بطل تقولها عادي غيرنا بيعمل ماتحبكيهاش!
هايحصل ايه لو ارتاحت لواحدة، وأخدت قوام قرارك بإنك عايز تكون معاها دايمًا وتريحها وتريح نفسك عشان في مستقبل بنات بيضيع، وحضرتك لسة بتأخد قرارك.. ياتبعد لما تحس إنك مش متأكد وبرضه هي هاترتاح.. وتبطل مبدأ العصايا اللي اتنحلت من كتر مامسكتها م النص.. وتبطل هي تستناك.
ها يحصل أيه لو كل الناس هادوا واتهادوا بورود من غير تكلفة ولا مصاريف، وعلى كل مناسبة نهادي بلون، نحب بالأحمر ونسامح بالأبيض، ونغير بالأصفر.. ونآمن إن في كل طين نبتة حلوة.
هايحصل أيه لو نقعد تاني مع بعض، ونبطل نسهر على الفيس، نرغي ونتكلم مع بعض.. نتحاكى ونقول سلامات.. أو تشرب كوباية شاي مع أخوك ولا أختك، اللي قابلتها آخر مرة من يجي أسبوع, وكانت في الطرقة وقالتلك لما خبطتها حاسب ياعم أيه المعتوه أعمى!.
وراح يحصل أيه لو متجوز وتبوس الست بتاعتك أم عيالك صباحًا ومساءً، خارج أو داخل بيتك، تصبح وتمسي عليها.. هايفرق معاها تحس إنها لسة حبيبتك.. مش يادوب وحيالله مراتك.. طب كانت أمتى آخر مرة تبوس إيدها وتقولها شكرًا علشان عملت أي حاجة حلوة لبيتك..؟.
فيها أيه أصلًا لو كانت كلمة شكرًا أيكونة في عيشتك.. نقولها لعيل.. لكبير.. لخفير.. لست بتكنس جنبك، لجارك لجارتك.. لأي بني آدم موجود في حياتك بيساعدك.. أشكر أصلًا وجوده جنبك.
فيها أيه يعني لو نتعود ع الأذكار صباحًا ومساءً ولسانا يقولها ولا يزهق.. ونبطل بقى نتريق ع اللي عليها اتعود ونحسسه أنه زودها و"أفور".
فيها أيه لما نسيب "التوك شو" ونرجع تاني نشوف نيلي، وشريهان ع "اليوتيوب" حلقة بحلقة، ونقرأ ميكي وفلاش وعلاء الدين، ونسمع عمرو دياب وفؤاد ونحلي بمنير.. ونشوف أفلام أبيض وأسود ونضحك بصوت عالي وإحنا بنتفرج على إسماعيل ياسين.. وبنسمع ضحكة هاهاااي بتاعة ماري منيب، واستيفان روستي لما بيقول في سيدة القصر "ثانية واحدة هاروح أتحزم وأجيلك".
وهايحصل أيه يعني، لما ندخل البيت ونسلم ع الست الغلابانة اللي مستنيانا ونغير التحية بدل "ها ياماما عاملة أكل أيه عايزة أكل يلا بسرعة".. ونخليها أزيك ياماما عاملة أيه.. عادي يعني.
وهايحصل أيه يعني لما واحدة نعرفها تتخطب، نبطل ندخل على بروفايل خطيبها.. أو العكس.. ونتعود نقول مبروك حاف كدة ونسيبهم ف حالهم من غير جملة "أوف يخربيته أحلى منها" أو "طب والنيعمة هي أحلى".
وهايحصل أيه لما ترمي اللي في إيدك من العربية وهي ماشية أو المترو وهو بيتحرك وتقول ما الكل بيعمل، ماتخليك في نفسك واستعبط على نفسك وأعمل نزيه احتمال نفسك تصدق ده وتخليك تتعود.
وهايحصل أيه لما تتفرج على فيلم أجنبي بسكات وبنظرية عماد أديب "بهدووووء" وتبطل تسأل إيه هو قاله إيه أصل مالحقتش أقرأ، وأزاي عمل كدة ومين اللي هايقتله، عشان بتضيع اللحظة على اللي متابع أصلًا بكتر أسئتلك دي واحتمال تزهقه فيبطل يتفرج معاك تاني.
وهايحصل أيه بقى لما كل واحد يقرأ الكلام ده ويكتب على اللي نفسه يحصل ومش عارف مابيحصلش ليه.