الواحد لما كان يشوف صورة لباباه أو مامته في السبعينات، تلقينا وقعنا على الأرض من الضحك! طيب أنا بأه حقولوكوا حاجة أظرف، جربتوا تفتحوا أكاونت الhi5 بتاعكوا القديم؟ ده مصنع ضحك يا جدعان!.. ميزة الحوار ده إن كل الناس هاجراه من 7 سنين على الأقل، وبالتالي بأه هتشوف نفسك وحتشوف صحابك من 7 سنين! عايز أقولوكوا كانت أنيل من السبعينات!. أنا عن نفسي اكتشفت إن كنت بلبس شارلستون! وكنت بحط لوجو الGUC على كل صوري من باب "الروشنة"، اللي وقعني بأه من الضحك إن كان كومنت واحد صاحبي اسمه ريان، بيقولي "إيه الروشنة دي" ده بجد؟! كان expression يدعو للفخر!. ولا بأه البنات يااااااه، كتبنلي بأه "الصور حلوة مووووت" و"إنت Friend جامد طحن" والبنت اللي عايزة تظبط وClass بأه وكده تقولي إنت "Cute"!.. أنا!. الضحك لسه مخلصش! أدخل بأه على بروفايلتهم! وشوف صورهم اللي طبعًا مش موجودة على instgram أو facebook لأنها صور عااار! الولاد اللي عملين قصة مصطفى قمر في الليلة دوب.. ولابسين قمصان مكرمشة! أو لابسين سلسة مكاوي.. والبنات اللي متصورين بكاميرا من قبل اختراع الPixels اللي مبينة شكلهم الحقيقي!.. لو عايز أتجوز أرجع لبروفايلها على hi5! ده الشكل اللي هتشوفوا بعد الجواز بعيدًا عن إبداعات Cannon الجديدة. طبعًا كل الكلام ده اتلغى أصلًا وبأه قديم "جدي"، بس بأه اللي أحب أقولهولكوا.. أنا كنت جامد جدًا! أنا كان عندي 30 Wall post بيشكروا فيا وفي صداقتي وفي أخلاقي، ومدح السنين بأه وموقف أهبل خلاني في نظرهم بطل.. حقيقي أنا فخور بنفسي في السبعينات.. إحم ..قصدي من 7 سنين.