إذا أتاك الإخوانجى منكسراً فاعلم أن فى ذيله مصيبة

أصابتنى هستيريا من الضحك المبالغ فيه عندما قرأت بيان إخواننا البُعدا جماعة الإخوان الإرهابيين الذى كان يحمل عنوانا مؤثرا «وعينا الدرس ووفاءً لدماء الشهداء الثورة مستمرة».
نعم؟! إيه؟! وعيتو إيه؟ ووفاءً لمين؟!
الناس دى بتهزر يا إما فاكرين أن بقية الثوار خونة زى اللى خانوا الثورة وتحالفوا معاهم.. لا يا إرهابيين العبوا غيرها إحنا قفانا مبقاش يستحمل واستوعب الدرس كويس..
لا أدرى هل هذه غباوة منكم كالعادة ولا انتوا فاكرين بجد ان احنا ممكن ننسى بكل سهولة؟!! طيب تحبوا نفتكر مع بعض حاجات بسيطة كده؟ تعالوا..
فى يوم 27 مايو 2011 أقام شباب الثورة مليونية فى ميدان التحرير ضد المجلس العسكرى وفى نفس اليوم قام الإخوان بحملات طبية للكشف على الناس بالمجان حتى لا يذهبوا لميدان التحرير، ووصف الإخوان الإرهابيين هذا اليوم ب«جمعة الوقيعة» واستهزأوا بالمشاركين فى هذا اليوم وأنهم يريدون الوقيعة بين الجيش والشعب؟
فاكرين يا إرهابيين لما بايعتو المجلس العسكرى بهتافاتكو الشهيرة «دقن جلابية العسكر مية مية»، «وألف تحية للمشير من قلب ميدان التحرير»... ناسيين؟!!
ولا تصريحات محمود غزلان وقتها بأن كلمة الخروج الآمن للمجلس العسكرى كلمة معيبة للجيش، وكمان قال الجماعة لا تمانع فى منح أعضاء المجلس العسكرى حصانة من المحاكمات؟! ولا عصام العريان لما قال هتاف يسقط حكم العسكر إهانة للجيش وإن الإخوان ستحترم الجيش للأبد وأن جماعة الإخوان تقبل بوضعية خاصة للجيش فى الدستور؟؟
ناسيين يا إرهابيين مانشيت جريدتكم الحرية والعدالة «قناع بانديتا خطة الأناركيين لنشر الفوضى يوم 25 يناير 2012» اليوم ده اللى كان أى حد بيهتف ضد المجلس العسكرى الإخوان كانوا بيشتبكوا معاه وشفت ده بعينى وضربوا ناس وخدوا ناس ورا المنصة بتاعتهم وكانوا بيعلّوا صوت الأغانى الوطنية على منصتهم للتشويش على أى هتاف ضد العسكر..
ناسيين يا إرهابيين لما محمد مرسى خطب يوم 25 يناير 2013 فى عيد الشرطة وقال إن الشرطة فى قلب ثورة يناير وإن العبور الثانى لمصر كان يوم 25 يناير والشرطة فى القلب منها، وقد أراد الله سبحانه وتعالى أن يكون 25 يناير عيدا للشرطة وذكرى ما ضحت به الشرطة ضد الاستعمار والمحتلّ؟!!
ناسيين أحداث محمد محمود لما قلتو إنها مؤامرة لإفساد عرس الديمقراطية عشان انتخابات البرلمان وإن الموجودين فى محمد محمود بلطجية وليسوا ثوارا ومن متعاطى المخدرات؟!!
ناسيين ست البنات اللى اتسحلت واتعرت واستهزأتو بيها وقلتو لابسة عباية بكباسين وإيه اللى وداها هناك؟
ولا منال أبوالحسن الإخوانجية لما قالت إن ميدان التحرير به مأجورون يعيشون فى الخيام بداخلها نجاسة.. ولما رفضوا المشاركة فى مسيرة ست البنات وقالوا إن المسيرة ممولة ولها أجندة خاصة وبها نساء لم يشاركن فى الثورة أصلا..
الإخوان طول عمرهم متآمرين ضد مصر والتاريخ خير شاهد.. الإخوان تآمروا مع الإنجليز والملك ضد مصر وتآمروا مع الإنجليز ضد مصر وتآمروا مع الضباط الأحرار ضد الملك والإنجليز وتآمروا مع الإنجليز ضد عبدالناصر وتآمروا مع السادات ضد روسيا وتآمروا مع أمريكا ضد السادات وتآمروا مع مبارك ضد الشعب وتآمروا مع المجلس العسكرى ضد الثورة وتآمروا مع أمريكا ضد الثورة والجيش المصرى..
اللى عايز الخراب لمصر ينزل مع الإخوان.