تقادم الخطيب مذكرًا العريان بمواقف الإخوان قبل الثورة : ''فاكر يا عصام''

وجه تقادم الخطيب، الناشط السياسي وعضو الجمعية الوطنية للتغيير، بعض الرسائل للدكتور عصام العريان، نائب رئيس حزب الحرية والعدالة، عبر موقع "تويتر"، يذكره بمواقف جماعة الإخوان المسلمين من ثورة 25 يناير 2011، وكيف رفض الإخوان في البداية المشاركة في المظاهرات التي خرجت ضد مبارك.

وقال تقادم موجهًا حديثه للعريان، عبر حسابه الشخصي بموقع "تويتر"، "ازيك يا عصام، أنا حاسس بيك، فاكر انتخابات 2010لما اتفقنا ما نخوضهاش في الجمعية الوطنية وبعدها جلستم مع حسن عبد الرحمن ونزلتم، فاكر لما مرسي رفض النزول يوم 23يناير لما كنا في اجتماع الجمعية الوطنية في مقر حزب الغد وقال لأحمد بهاء شعبان دي دعوات مراهقة".

وأضاف الناشط السياسي: "فاكر يا عصام لما اتفقنا يوم 31يناير في عيادة د.عبد الجليل علي رفض لقاء عمر سليمان وبعدين ذهبتم وجلستم معه واتفقتم على إخلاء الميدان، فاكر يا عصام لما اتفقنا على عمل مجلس رئاسي مدني يوم12فبراير في حزب الجبهة وفيه طلب ذهب به البلتاجي ود.حسام عيسي للمجلس العسكري، فاكر بعدها عملتم إيه يا عصام، ذهبتم للمجلس العسكري ورفضتم فكرة المجلس الرئاسي بعد ما اتفقنا جميعا عليها وقلنا لازم نعملها".

وتابع الخطيب: "فاكر يا عصام لما اتفقنا بحضور البلتاجي يوم2مارس في عيادة د.عبدالجليل علشان نصوت بلا على الاستفتاء، وصوتم بنعم وخدعتونا، فاكر يا عصام في اجتماع الجمعية في يوليو لما اتفقنا على تشكيل لجنة قانونية بقيادة أبو بركة للطعن على نتيجة الاستفتاء لمجلس الدولة، فاكر يا عصام لما سعد الحسيني والبلتاجي وأبو بركة حضروا الاجتماع ده وبعدها ذهبتم للعسكر واتفقتم على على تكوين تحالف ضد هذا، فاكر يا عصام لما اتفقتم مع المجلس العسكري على وثيقة السلمي وبعدين رفضتموها بالمظاهرات وانت يومها كلمت د.عبدالجليل وانت بتعيط، فاكر يا عصام الوثيقة اللي كان موقع عليها التحالف ورفعها للسلمي بالموافقة وبعدها على طول فضحكم السلمي وأعطانا الوثيقة".

وأردف عضو الجمعية الوطنية للتغيير، قائلاً: "فاكر يا عصام لما اتفقنا على معارضتها لقانون الانتخابات وبعدها على طول أرسلتم خطاب ليحي الجمل موافقين على القانون من ورانا، فاكر يا عصام لما رفضتم وثيقة السلمي والوثيقة والمبادئ الحاكمة للدستور وبعدين رحتوا عند العسكر واتفقتم عليها وطعن تم فينا، فاكر يا عصام لما ذهبتم للمجلس العسكري وهددتم إن البرادعي لو جاء رئيس وزراء حتولعوا البلد وبعدها اتصلتم بالجمعية علشان نقعد، فاكر يا عصام لما عمر سليمان رشح نفسه ولما البلتاجي اتصل بالدكتور عبدالجليل ورجليه بتخبط في بعض من الخوف وبيقول ماتسيبوناش"

وتابع الخطيب: "فاكر يا عصام لما الإعادة جت بينكم وبين أحمد شفيق واتصالاتكم بينا وتوددكم إلينا والخوف الذي كان يسكنكم والرعب، فاكر يا عصام بعد ما حصل في اجتماع الفيرمونت واتفقتم مع الناس وبعدها أخللتم ما وعدتم واتصالاتك بالناس يا عصام، فاكر يا عصام لما قابلتك في قناة الجزيرة في شهر يونيو ومارضيتش تطلع معايا علشان ما أفضحكش لرفضكم المشاركة ضد المجلس العسكري، فاكر يا عصام صفقة انتخابات البرلمان في 2005لما كان اللواء خالد ثروت مفتش أمن الدولة بالمنيا ودلوقتي أتيتم به مديرا للأمن الوطني".

واختتم الخطيب حديثه إلى العريان قائلاً: "فاكر الصفقة والوسيط اللي كان فيها طبعا انت عارف العوا كويس يا عصام وعارف حاجات كتير يا معلم وعلاقة الكتاتني بخالد ثروت، فاكر يا عصام مين اللي اقتحم السجون وهرب المساجين ولما البلتاجي قبلها بيوم قال حنخرج الرجالة بتاعتنا، وفوق ده كله لو كنت ناسي أفكرك يا عصام أنا كنت مقاطع الانتخابات.. وقبل ما أنسي السجن في انتظارك".