م الآخر| Yes We Can.. أيوة نقدر

Yes We Can.. جملة جميلة ومعناها حلو أوي، بس الأحلى إننا نعمل بيها ونستخدمها في حياتنا.. لازم يكون عندنا روح الجملة دي بعد الثورة، فكروا كده معايا ولو للحظة، بلد زي اليابان ماكنش عندها أي حاجة، أو بمعنى أصح معندهاش أي مورد زي مصر، بس هما قالوا إحنا نقدر.
في العدوان الثلاثي على مصر، الجيش المصري قال إحنا نقدر، ومش هنخاف وغيره كتير، والغريب فين الروح دي راحت بعد الحروب، والوقوف ضد الظلم في مصر، ليه الروح دي بتبقى وقتية وبتروح تاني؟.. لازم نرجع الروح دي، واوعى تقول مش هينفع مستحيل.. لا مش مستحيل، مفيش حاجه اسمها مستحيل، كله ممكن، بس لازم كله يشتغل، طيب أعمل إيه علشان أقدر أقول الجمله دي؟.
لازم علشان تقدر تقول الجملة، لازم تقول أنا أقدر وتقنع نفسك بيها، شوف إنت عندك مهارة في إيه ونميها واعمل المستحيل واوعى تقول مقدرش، مش هينفع، مش ممكن، مش معقول.. طيب جرب كده شيل كلمة "مش" من حياتك، وشوف الدفعة اللي هتاخدها.. هقدر، هينفع، ممكن، ومعقول.. هو ده اللي أنا عايزه.
طيب هيفيد بإيه إني أقول أنا أقدر؟، لو كل واحد قال أنا أقدر، يبقى كده حققنا جملة إحنا نقدر، ولما نحقق جملة إحنا نقدر هننجز أعمالنا، ولما ننجز أعمالنا هنتقدم، ولما نتقدم هنرتقي بين شعوب العالم، ولما نرتقي بين شعوب العالم هتكون لينا قيمة، وفوق ده كله هنحقق أمر الله، وهو العمل وتعمير الأرض.. ما أحلى كده!.
عايزين إيه أحلى من كده، إنت عارف لما تشتغل ربنا بيجازيك خير، طيب إنت عايز إيه أكتر من كده.. يبقى متقولش مستحيل، قول وبصوت عالي أنا أقدر، ولما كله يقول كده بصوت عالي، يبقى حققنا الجملةYes We Can.
ارتقي بنفسك أيها الإنسان، فلما لا ترتقي؟!، كم من قوم ارتقوا بأنفسهم وأنت مازالت تنتظر!.. دعوة عامة لكل الناس، قولوا وبأعلى صوت "أنا أقدر".