م الآخر| موال الزين

حزين ليه يا زين
وبتوزع ف عيون الفرحانين
دمعك..
صحابك.. ميبقوش صحابك
لو انفضوا من حواليك
لحظة م ينطفي شمعك..
****
البكا.. ضرر للعين
ف متبكيش يا زين
إلا على حاجة.. تكون فايدة..
الخسرانين.. صحابك
سابوك
لما ملقوش من ورا أبوك.. فايدة..
**
احمد صاحب الفايدة
على الفايدة..
احمده على الضرر والفايدة
احمده على لقمته
ونعمته.. يخلقهالك
ولا يطلب قصادها فايدة..
**
إحمده على بصرك وسمعك
قالك عبدي.. طيعني وطاوعني
أكون بصرك وسمعك
ولو عصيته.. ودعيته
من فوق السما
سامعك
حتى لو باب الدنيا قفل
وصوتك.. راح منك وأفل
حتى لو كنت طوبة
ف عز طوبة
مبتتكلمش
من فوق السما
سامعك..
**
ضحك بقى العين
ومتحزنش يا زين
على صحابك.. أو حالك
ربنا خلاص أوحالك
إنه سامعك