أشعار الثورة علي الفيس بوك

هذه لقطات من أشعار بثها علي الفيس بوك شعراء وأشخاص عاديون حولتهم اللحظة العظيمة شعراء‏..‏ ولو للحظة‏.‏ اقتطفناها‏,‏ أو اقتطعناها من قصائد لم نلتزم بنصها الكامل‏,‏ دون إذن أصحابها‏,‏ فشكرا لهم وعذرا‏..‏ وباحبك ياكبيرة
محمد كشيك
وباحبك ياكبيره
كده من غير أسباب
وسواء كنتي فقيره
أو صاحبه القاب
شمس قويه مضيئه
أم, مكسيه هباب
وباحبك في الضيقه
جوه البحر غريقه
وسواء كنتي حقيقه
أم أوهام وسراب
وباحبك ياكبيره
ساكنه في عين الصيره
أو دير فيه رهبان
تجري عشان تصبيره
أو ملكه, ومانيكان
بتنامي علي حصيره
أو في حرير وساتان
فلاحه, في غيطانها
أجراس حاضنه أدانها
دير يجمع رهبانها
تبتهج الأوطان
وباموت قوي م الغيره
لو مصري, بيتهان
,,,,,,,,
وباحب الترويسه
فيها, أدان وكنيسه
أحمد حاضن عيسي
وجميعا إخوان
وجميعا أحباب
وباحبك ياكبيره
كده من غير أسباب
وباحبك منصوره
ع الباغي الكداب
كنت باحبي
سليم فؤاد حداد
كنت باحبي زي كهل عجوز
فوق كتافه تلول سنين
من الدنيا متعكرة
تجري عيونه علي الارض
بين تراب ناعم وبين الزلق
شايل همومي شايل حمولي
مش قادر انهض يا شباب من الغرق
صوتي اندلق ما بين اناشيد
وغناوي محبوسه
بين ضلوعي وبيبان الاوض
باتلفت وخايف أتمسك باحلم
بقمح وقطن وجواز الولد
ايدي علي الاكره باتعافي
بافتح باب الشقه بالعافيه
زراير قميصي متقطعه
وكمامي طويله لحد الركب
متساق علي القبر بالعافيه
وايديا ورا ضهري خلف خلاف
ماشي للقبر بالراحه
متطمن وانا خايف
وانا عارف
ان الوقت مش وقتي
يا طالع الحج علي الناقه
قول للنبي انا نفسي مشتاقه
ياطالع الغرب تتفسح
قول للامريكان تفتح
بيبان دكانها بالراحه
الدنيا مرتاحه وانا تعبان
الدنيا دفيانه وانا بردان
ماشي وناسي الوصف والعنوان
غنيت......
يا وردة يا بعيدة ويا قريبة
مش غريبة بين الكحك يا غريبة
يا فجر الحق يا مصر يا طيبة
لا يمكن تلاقي بين الوحوش غزلان
ولا فجر طالع الا ويعلي للسما بادان
مناره ومادنه في اول الشارع
وفي اخر الشارع...
قنبله محدوفه ترش البكا
ترش البكا علي خدود الولاد دخان
يا رصاص يا مطاطي
مش حنطاطي من تاني
يا رصاص يا حي
الله حي عداني
ميداني زي القلب وبينبض
بجبين عريض الجبهة والعنوان
الكل في الكل والحنجره واحد
عمر طوب الغل ما يحطم في يوم انسان
عمر رصاص الذل مايمسح الفكره
اللي بتبني وتعلي في البنيان
تشتمني في ابويا وتشتمني في امي
تبعت حميرك وتبعت بغالك
تبعت حديدك وتبعت نيرانك
تلقاني جني باكبر وباعلا
واعلنها ثوره بحق وحقيق
باسم الشباب
مرصوص يا شعب أصيل كما البنيان...
عمر سامح هلال
مرصوص يا شعب أصيل كما البنيان
علي كوبري قصر النيل ألوف جية
والصدر عاري يواجه الطغيان
ميت ضميره, و طلقته حية
نازلة القنابل فوقنا زي السيل
و الناس تشم الغاز, تشد الحيل
و كإنه كاتب في الهوا: هيا
هانت خلاص يا شعبنا و بانت
لان الحديد و قلوبنا ما لانت
كانت بلدنا عالية و اتهدت
دلوقتي راجعة زي ما كانت
راجعة بتحضن في التاريخ الوعد
راجعة بترفع في المواكب سعد
راجعة لا عارفة مسلمين لا اقباط
الدم واحد قبل هذا و بعد
راجعة تدوس العجز و الإحباط
و يدوي صوتها م الحناجر رعد
و تعدي وسط الملحمة ندهة
آدي بلدنا الحرة و عنادها
و آدي رجالها للي يجهلها
كانوا و ما زالوا خير أجنادها
يسقط شهيد, يصحي الغضب ويقوم
يصرخ جريح, يعلي الهدير ويزوم
يا نعدي فوق الناريا إما نموت
والعمر واحد والمصير محتوم
عدينا و الحيط القوي اتاخر
و الحق شق السكة في الآخر
و كإن سينا و الميدان واحد
و الشعب زي الجند يتفاخر
و الجند عادوا للميدان تاني
و الدبابات جنازيرها واحشاني
و الثورة قايمة و الأمل زاخر
و يناير النابض و أشهاده
لما لمسنا جمرهم عادوا
رفرف يا طير الجنة بسماحة
و اسمع شبابنا و هما بينادوا:
دم الشهيد وصلنا للساحة
ماحناش هنمشي إلا في معاده
لو يضربوني بقنابل...
محمود فهمي
لو يضربوني بقنابل
غير الرحيل مش قابل
هو الوطن بالساهل
يصبح وطن اجمل
لو يضربوني بطوب
عن الميدان ماهاتوب
حب الوطن مكتوب
وانا لاجله راح اكمل
وهيعمل ايه المولوتوف
في قلوب ماتعرف خوف
وعيون خلاص بتشوف
مهما الضلام طول
لو عدي ليل ورا ليل
لليأس عمري مااميل
حتي المطر لو سيل
انا برضه هاتحمل