يا حبيبتى يا مصر

■ باحبك يا مصر. وحبك بيجرى فى دمى.. وساكن فى عقلى.. وانتى قلبى.. باحبّك رغم الفساد والبطالة والاقتصاد والعنوسة والمواصلات والسكن والتعليم.. وعمى اللى مات فى قطار الصعيد.. وأخويا اللى مات شهيد.. باحبك يا أمى يا نبض الحياة.. وبعشق ترابك ونيلك.. ونفسى أديلك.. ويمكن بكرة يبقى أحلى.. هاعلم ولادى حب الوطن برغم المرارة والحرارة.. وهاترك وصية واكتب فيها حب الوطن إيمان.. باحبك يا أحلى مكان.
أحمد رشدى محمد- مذيع
■ بلدى يا أحلى بلد فى الدنيا بلدى يا حبيبتى يا أمى التانية.. بلدى فى دمى ومافيش حاجة تانية بلدى أنا عاشقك لآخر ثانية.. وحشانى بطريقة غريبة وحاسك حبيبتى قريبة.. ضمينى لحضنك ضمى خلينى أحس الطيبة.. يا بلدى انتى غالية عليا وفى قلبى أعز حبيبة.. أنا راجع حبيبتى إليكى عشان ابنى وأعمر فيكى.. أنا مهما ألف بلاد أنا لازم أعود تانى ليكى.. فى الدنيا دى ياما بلاد لكن انتى مافيش بعديكى.. يا بلدنا انتى فضلك أكبر شلتينا كتير فى عنيكى.. وحشانى بطريقة غريبة وحاسك حبيبتى قريبة.. ضمينى لحضنك ضمى خلينى أحس الطيبة.. يا بلدى انتى غالية عليا وفى قلبى أعز حبيبة.
مصطفى ممدوح محمد
■ وحشتينى وأنا ف حضنك.. ومش قادر على حزنك.. ولا قادر أشوف الليل.. بيقطع حتة من غصنك.. بتتبدل سواقى النيل.. ولا فايض ولا بيسيل.. ويبكى الورد فى البستان.. ماكنتش يوم يا نهر بخيل.. ولما ضن أولادك.. فاتونا نشتهى زادك.. ومهما غربونا سنين.. بنرجع تانى فى ميعادك.. وحشتينى وباتألم ودمعة عينى بتسلم.. على صورة وطن وشهيد.. وصوت ماقدرش يتكلم.. كدة يا مصر سيبتينى.. أحارب فى طواحينى.. وبارجع كل يوم مهزوم.. ومبترضيش تواسينى.. أنا المسكون بأحلامك.. وأنا المسجون ف آلامك.. وأنا آخر قلم مجروح.. أنا عبدك وخدامك.
مدحت أنور نافع- خبير بالمحاكم الاقتصادية
■ الله محبة والحب للمؤمن شعار.. الحب لما يبقى بينا صادق.. تصبح الضلمة نهار.. والحب لو غاب من قلوبنا.. قول على الدنيا الدمار.. لو قلب ضاع الحب منه.. راح يعيش الجنة نار.. تعالى نسامح بعض نفرح.. نزرع بذور الحب تطرح.. نلاقى الدنيا بقيت جنة.. فيها نتهنى ونتحنى بالعمار.. دا الحب الحقيقى للقلوب.. يضحى ما يعرف هروب.. ألف وردة للى أخلص فى المودة..
حب الوطن صان التراب.. قلوب مابتحبش خراب.. لونها أسود كالغراب.. تلقى طعم الدنيا مر.. تبقى غاب.. تبقى للعطشان سراب.. ألف وردة للى أخلص فى المودة.. واللى عشعش جنب طيره.. مامنعشى حد خيره.. حب غيره وأهل داره.. ضحى لزميله ماخنشى جاره.. ألف وردة للقلوب.. اللى لو عشقت تدوب.. اللى بتحب بصحيح.. قلوب بتعشق من صميمها.. صامدة ما اهتزت بريح.. قلوب طاهرة ما تعرف تخون.. قلوب للوداد دايماً تصون.. لما نحقد على بعض.. لما يبقى بينا بغض.. ولا تار.. لما نكره بعض عار.. الله محبة والحب للمؤمن شعار.
راضى على أحمد حسين
■ بلدنا بلد الأمان بلد السلام والحب.. فى دمنا حبها.. الروح ونبض القلب.. مصر اللى من حبها ولحبها عايشين.. واللى فى سبيل عزها دايما يهون الصعب.. مصر الإيمان والهدى مصر العلوم والنور.. مصر التاريخ والخلود مهما الزمان بيدور.. مصر السلام والمحبة مصر نبع الخير.. الحب فيها شريعة.. والوفاء دستور.. مصر اللى ياما كتب عنها التاريخ صفحات.. وشعبها الحر صانع أعظم الحضارات.. مصر الهدى والتقى مصر العلوم والدين.. مساجدها جنب الكنايس للهدى منارات.. مصر السلام والمحبة والعلم والإيمان.. عاش الهلال والصليب على أرضها إخوان.. مسلم مسيحى فى بلدنا الجميع مصرى.. لنا الوطن كلنا.. والدين للديان..
محمد حسبو الأقرع
عضو اتحاد كتاب مصر