م الآخر| المحجبة في الدراما والسينما

ليه لما بتفرج على فيلم أو مسلسل.. لازم ألاقي دور البنت الشعبية أو بمعنى أصح "البيئة" أو البنت الفقيرة لازم بتكون يا إما فنانة محجبة يا إما فنانة مش محجبة بس لابسة طرحة عشان "تِسبُك الدور كويس".
طيب ليه لما ألاقي ممثلة بتعمل دور واحدة غنية في وظيفة محترمة من أسرة مستواها المادي كويس عايشة في فيلا وراكبه أحسن عربية ومتجوزة راجل غني وعايشة معاه عيشة ميسورة الحال إلى أبعد حد.. دي لاااازم تكون سيده مش محجبه في الغالب؟ ولو عدينا كام دور زي ده قامت بيه فنانة محجبة فممكن نعدهم على صوابع الإيد ا.
ليه صورة الحجاب بقت مشوهة في التليفزيون والسينيما بالطريقة دي؟!.
هو مش الفن بيعبر عن الواقعية ولا إيه؟ والواقع اللي إحنا فيه إننا في بلد إسلامي منتشر فيه الحجاب بدرجة كبيرة مش زي زمان في أيام السبعينات يعني! لكن دلوقتي بقت فكرة الحجاب منتشرة جدا في معظم البنات وأرقى المستويات.
مع كامل احترامي طبعا لكل البنات غير المحجبات، بس أنا أقصد إن دلوقتي بقى الفكر أوسع وأعمق والثقافة الدينية انتشرت بصورة أكبر والمعظم فهم إن الإنوثة والرقي مش مقتصرة بس على الشعر والجسم وده طبعا بيتعارض مع صورة الفن للبنت المحجبة من وجهة نظري.
نفسي تتغير النظرة الفنية للحجاب عشان متحسش المحجبة إن حجابها بيقلل منها أو من مكانتها في المجتمع اللي هيا عايشه فيه.