م الآخر| مجتمع حافظ مش فاهم

في البداية عايزة أقول إن أنا مش محجبة، وده شئ عادي؛ لأني بشوف ده حرية شخصية، صحيح أنا عارفة إن دي حاجة حرام، وإن ربنا أمرني إني ألبس الحجاب، بس أكيد إن شاءالله، ربنا يبعتلي الهدايا من عنده ويجي يوم وألبسه.
المشكلة، إن كل الناس بتبص للبنت اللي مش محجبة على إنها واحدة شمال، وخصوصًا الشباب، مع إن معظم البنات اللي بيلبسوا الحجاب بيبقوا بيدّاروا وراه، ومش بس الحجاب لا كمان النقاب!!.
حصل معايا كذا موقف بيدل على حقيقة كلامي.. كان ليا صديقة محجبة، وتصرفاتها محترمة جدًا مع كل الناس، ولما خدنا على بعض في الكلام، لقتها بتكلمني في كلام مش كويس، استغربتها جدًا وبدأت أبعد عنها، لكن هيا كانت بتقرب، واكتشفت مع الوقت إنها عندها (شذوذ)، فقطعت علاقتي بيها فورًا، فهل هنا الحجاب ومظهرها الخارجي ولبسها، شفعوا ليها ولتصرفاتها؟!.
وموقف تاني، كنت خارجة مع أصدقائي في مكان بنتصور فيه، وفوجئت إن في بنت في منتصف العشرينات منتقبة، وقفت قدام كل الناس ورفعت النقاب من على وشها، وبدأت تهرج بصوت عالي وتتمايل بجسدها يمين ويسار، وكان معها شخص بيصورها.. للدرجة دي اتشال برقع الحياء من على الوشوش!!.
نفسي بس الناس تفهم، إنه عمره ما كان بالحجاب ولا بالنقاب، نفسي نتقدم ونبقا مجتمع بيقدر البنت وبيحترمها لتصرفاتها، مش لمجرد بس إنها مش محجبة تبقا (شمال).