م الآخر| "تيكيت التفاحة"

أحلى حاجة بعد القبض، إن الواحد يروح "السوبر ماركت"، يضيع الفلوس اللي قبضها، قبض بابا.. المهم بعد ما روحنا بقى، لازم أكل من اللي جبته، باخد تفاحة لاقيتها، زي مانتو شايفنها كده، مكتوب عليها مانجو فاخر!.. ممكن أي حد يضحك وعادي، بس معرفش ليه فكرتني بنظام مبارك!.
"البت دي عبيطة ولا إيه؟"، استنو بس آآآه والله "زمبؤلكو كده".. زي نظام مبارك، إحنا عارفين إنها تفاحة ومتأكدين من ده، بس هم حاطين عليها مانجة، ومصممين على إنها كده، بيستعمونا وإحنا عارفين الحقيقة،
بيسرقونا وإحنا عارفين وكلنا ساكتين.. ولو حد سألك دي إيه؟، تقول تفاحة يقولك لاء مانجة، وغصب عنك تقول مانجة، وتمص البذرة بتاعتها كمان!.
نظام الإخوان بقا، جه يكحلها عماها، تلاقيه يقولك دي موزة، يااا عم الله يهديك دي تفاحة يقولك لاء، طب دي مانجا، زي ما كاتبين عليها، يقولك لاء دي موزة، وهتاكولها وهي موزة وتقشرها كمان.. والمواطن الغلبان يسد بوءه ويكلها غصب عنه.. كانو بيبعولنا الهوا في أزايز، مشروع النهضة.
يقولك أصل الدين بيقول إنها موزة، طب يااا عم تفاحة، لاء إنت كافر وخارج عن الملة، يلا أهي أيام وعدت لحالها، وربنا يستر علينا الأيام دي، ومتطلعش دي في الآخر فيل وناكله بردو.. ويارب التفاح يرجع تفاح، والموز موز، والمانجا مانجا، وترجع كل حاجة لطبيعتها.. سيبكو من الرغي ده، أهم حاجة التفاحة "إتاكلت وطعمها حلو".