مصر كيوت

أجمل بنت ف عينى حبيبتى..
وانا عارفك بيا بتتباهى
هافضل اغنيلهم من قلبى..
مصر كيوت يا جماعه والله
جوه عنيّا يا مصر جميلك
شايلهولك مش مغلول
رغم المطره كتيره تجيلك..
ليه أنا ناشف مش مبلول
باملى إزازتى بمية نيلك..
واسند طولى بمية فول
أتنفس دخان شكامينك..
فامشى اطوّح كالمسطول
.........
واطلع عين الصبحيه
اللى يزنق جوه الأوتوبيس
باحلم وانا رايح على شغلى..
أنا مالى إذا كنتم متاعيس
وإشاره توقفنى اتامل
فى المزة اللى تعدى عليّا
واتمنى تسمحلى أكمل
.. تقفل شباك العربيه
.........
يا حبيبتى طعمك ع المغرب
.. كوباية شاى بالنعناع
وشوية لب وحلبسه
.. ع البحر يزقوا الأوجاع
جنب حبيبة بتاخد صوره
.. لحبيبها ف وسط الكورنيش
جنب عجوزه فارشه رصيفها
.. بنص ملايه وحالفه تعيش
جنب الحلم بتاع الراجل
.. اللى معديهم بفلوكه
والطفله اللى بتبكى لماما
.. علشان طارت منها التوكه
والواد الواقف مستنى
.. أى مواصله مدينة نصر
وحبيبته بتحلم بالفارس
.. وحصانه الأبيض والقصر
الجامع حس بأحلامهم
.. قام جلجل بأدان العصر
وكنيسه تلعلع أجراسها
.. إعلانا لحضور النصر
شفت جلالة هذا المشهد
.. هذا المشهد شِبر ف مصر