نُص بيضحك والتاني زعلان.. "بابا محمد" لما راح يجيب نتيجة ثانوية التوأم

"ليلة النتيجة" لم يهدأ بال "بابا محمد"، لكنه رغم ذلك استيقظ مبكرًا وحالة من التوتر تسيطر عليه لكنه تحاشاها بتمتمة من الدعاء، فاليوم لا ينتظر فرحة واحدة فقط، بل فرحتان، فليده تؤأمتان بالثانوية العامة إحداهما استطاعت التفوق فيما حصلت الأخرى على مجموع ضعيف، أما "مينا" الطالب "الدحيح" كما كان يقال عنه ذهب لمعرفة نتيجته وعاد ليجد الشارع بأكمله في بيته لتهنئته بنجاح لم يحظى به، لكن "ناصر" كانت حكايته مختلفة، فكلما دخل على إحدى المواقع الإخبارية وجد نتيجة مختلفة، مواقف مختلفة جمعتها روح الفكاهة ولسان حال شخوصها "نُصي بيضحك والتاني زعلان"
فمنار وميار محمد، توأمتان حصلت إحداهما على 66٪ والأخرى 96٪، تحكي "منار" عن شعور والديها فتقول "أدوا لبابا النتيجتين ورا بعض كدة في وشه، دماغه لفت ومشاعره اتلخبطت، أيموشن غريب على وشه اللي هو ربع وشه مبسوط، وربع زعلان، وربع بيعيط، وربع مش فاهم، مش عارف يفرح علشان مجموع أختي ولا يزعل على مجموعي، وهي كانت بتعيط علشاني، وأنا كنت فرحانه علشانها، ماما كانت بتحضنها وبتباركلها وبتواسيني، هي كانت مرحلة أولى دخلت إعلام القاهرة وأنا كنت مرحله تالتة ودخلت حقوق".
أما مينا مجدي، كانت لحظة نتيجته على نسق فيلم "لخمة راس"، يحكي عن تلك اللحظات فيقول: "كنت الأول على دفعتي دايمًا، بس لما روحت أجيب نتيجة تانية ثانوي، لقيت المدرس بيقولي معاك إنجليزي، وطبعًا لأني عمري ما شيلت مادة مكنتش أعرف يعني لإيه معاك إنجليزي اللي قالها دي، لحد ما فهمت، ولسه هتصدم لقيت بابا بيقولي مبروك مش محتاجة سؤال، قولتله بس أنا عايز أقولك حاجة، قالي لما نروح، مامتك مستنياك، روحت لقيت ماما عازمة الشارع كله عندنا وجايبة 10 صناديق حاجة ساقعة وصوت الأغاني اللي مشغلاها جايب آخر الشارع، قولت استنى لما الناس تمشي، وفي آخر اليوم لقيت ماما بتقولي نفسك مسدودة ليه، أكيد من الفرحة، وقبل ما انطق وأقولها إن نفسي مسدودة من القهرة اللي أنا فيها كانت كلمت ستات العيلة كلهم وقالتلهم إن ابنها نجح زي كل سنة، فقررت إني مقولش لحد، دا غير واحنا بنتعشى لقيت ماما بتحلف بيا وبتقول هو في زي مينا".
أما جورج ناصر، الذي اختلف مجموعه من موقع لآخر، فيحكي: "الأول شفتها من موقع إخباري طلعت 89% طبعًا فرحت، دخلت على موقع الوزارة لقيتها 83% قولت يبقى فيه حاجة غلط، ولاقيت الحج بيقولي شوفها في موقع تاني، دخلت على موقع ثالث لقيتها 75% وشايل مادة، وبابا جنبي وباصصلي، طبعًا قولت هنتقم بعد ما ترجع تاني 89%، قومت دخلت على موقع إخباري رابع لقيتها 70% لاقيت أبويا وشه قلب فقولتله استنى بس لسة فيه موقعين تلاتة كمان يمكن أكون لسة في الإعدادية".