عزيزى الراجل العانس
تحية طيبة وبعد:
آن الأوان بقى نتساوى فى الألقاب طالما بتقولها كده بقلب جامد يا أخى، هتقولى يا'عانس‘ هقولك يا سيد العوانس، هتقول لى يالى محدش بيبص فى خلقتك، هقول لك يالى لفيت على طوب الأرض وكل البنات رفضتك.
لأ... ما هى الحكاية مش فرد عضلات، هتئذى مشاعرى يبقى لازم لك نصيب من أذية المشاعر، هتقول لى راجل والراجل ما بيعنسش، هقول لك إنت ليه اتضايقت من الكلمة وأخدتها كده على أعصابك؟ ولاااااا... وجعتك وجت على رجولتك، طيب بقول لك إيه من الآخر كده وعلى بلاطة زى ما هتوجع بكل بساطة لازم تتوجع وطالما إحنا الإتنين عايشين فى نفس المجتمع يبقى لازم يلطك نفس 'الاختراع السخيف‘ ولا عاوزنى أفضل ساكتة ومقهورة كده لوحدى، قال 'عانس‘ قال.
وفجأة كده وبدون مقدمات بقى اسمه تأخر سن الزواج ومافيش حاجة اسمها عانس! فجأة كده قلبت إنسان متحضر وراقى ولا اتعدلت لما الكلمة طالتك والبطحة اللى على رأسك وجعتك، ياااااااه مجتمع ما بيجيش غير بالمعايرة.
كانت البداية لما راح 'مصطفى‘ يتقدم ل'بسمة‘ بنت الأستاذ يحيى، ودى ماكنتش المرة الأولى اللى بيتقدم فيها لبنت الحلال، ده اتقدم قبلها لعبير وسناء وريهام وسهام وسلمى ونادية وفادية ودعاء وولاء، وغيرهم كتير، وكان كل مرة بيترفض لدرجة إنه خاف على نفسه لا يعنس، بس الحقيقة الست والدته كانت فى ضهره وبتدي له المُسكن المعتاد اللى هو 'إنت ألف واحدة تتمناك يا نور عينى‘، طيب ما هو تقريباً اتقدم للألف واترفض يا حاجة عواطف، ما علينا المهم إن الست 'أم بسمة ‘ماعجبهاش 'مصطفى‘ أصله ولامؤاخذة مليان حبتين ومش حليوة زى خطيب بنت أختها سعاد.
خرج مصطفى من بيت بسمه مكسور الخاطر ومرفوض من العروسه وأمها ،وبصراحه مبقاش عارفه هى دى المرة الكام اللى اترفض فيها من كتر مابيترفض سواء لأسباب تافهه أو لأسباب واقعيه،والست عواطف مازالت واقفه فى ضهره بكلماتها المداويه لجروحه 'لسه العمر كله قدامك إنت لسه 35سنه بس ،والراجل مايعبوش حاجه،ياحاجه إتقى الله شويه ده إنتى من يومين كنتى بتعايرى 'الست فريده ‘جارتك ببنتها اللى بقى عندها27سنه وماتجوزتش وقولتى لها بالنص كدا 'ماتلحقى بنتك ياختى قبل ماتعجز وتكرمش ومحدش يبص لها‘...تكرمش إيه ياست إنتى وهى فى السن ده وبعدين إشمعنا إبنك لسه العمر قدامه أعوذ بالله من تفكيرك ياشيخه.
مش كدا وبس ده إنتى فرجتى الشارع على الست 'عنايات ‘جارتك لما قالتلك ماتجوزى مصطفى بقى ياختى ده القطر فاته من زمان والبنات بقت علطول ترفضه ولا هو حلال لابنك وحرام على غيره،الغريب إن ابنها عنس وبرضه بتعاير بنات الناس مش حاسه بنفسها دى ولا إيه ! ،ماعلينا.... تمر السنين ومصطفى وصل لسن الأربعين ويتقدم ويترفض لحد مازهد الموضوع خالص، وقرر يفضل طول عمره من غير جواز،لأنه كمان مالقاش البنت المناسبه اللى يقتنع بيها وبصراحه هو كان رافض موضوع جواز الصالونات ده بس الست أمه اللى كانت ضغطه عليه.
الأستاذ مصطفى مابقاش يحضر أى مناسبات أو تجمعات علشان يسلم من ألسنه ستات العيله اللى كل مايشفوه يمصمصوا شفايهم ويتودودوا عليه ،ياحبه عينى بقه من بيته لشغله علشان يريح دماغه من أفعالهم.
طيب مصطفى كدا وصل سن الأربعين وماتجوزش ،يبقى بزمتكم 'عنس ‘ولامعنسش‘؟!، مش هى دى المراحل اللى بتمر بيها البنت اللى 'بننده لها بالعانس ‘ ،يبقى مصطفى كدا عنس ياجماعه.
أيوة...هو مصطلح قاسى جدا ،لامؤاخذة ياعم الراجل جرحتك فى مشاعرك، هايجيلى حد دلوقتى يقولى مافيش أصلا مصطلح إسمه عنوسه فى حاجه إسمها تأخر سن الجواز، هقولك الله عليك وعلى عقلك أومال هاريين البنات ليه بالمصطلح ده ،هتقولى من النهايه كدا الراجل مابيعنسش مهما كبر ،هقولك بيعنس لما بيتأخر فى سن الجوازويترفض عمال على بطال وعلى فكره من جواه بيبقى مضايق من التأخير بس بيكابر علشان راجل، وبرضه ده شىء مش بإيده والموضوع نصيب.
هتقولى لسه الراجل مابيعنسش ،هقولك بيعنس لما يريح دماغه ومايبقاش حابب يتحمل مسؤلية بيت وأسرة ويقرر مايتجوزش وده فى مجتمعاتنا مسموح به للراجل بس لكن البنت بتتفضح وتبقى عانس،هقولك الراجل ممكن يعنس حتى وهو متجوز لما مايختارش صح ويتجوز أى حد والسلام علشان الشكل الإجتماعى يكمل.
هتقولى الراجل مابيعنسش ويتجوز ويخلف فى أى وقت هقولك صح جدا ،الست برضه ممكن تتجوز فى أى وقت والخلفه برضه نصيب.
هتقولى مافيش حاجه إسمها راجل بيعنس ،هقولك ولافى ست بتعنس ولا ينفع يكون فى أى مصطلح يجرح مشاعر ست أو راجل،ماينفعش تحمل البنت فوق طاقتها ،ماينفعش تهينها وتتعب نفسيتها بسبب وضع هي ملهاش يد فيه ، البنت لما بتتأخر فى سن الجواز دى بتبقى حاجه خارجه عن إرادتها وحتى ياأخى لو بإرادتها ،ماتسيبها بحريتها إحترم قرارها ماإنت أكيد مش عارف إيه أسبابها ودوافعها،خاصة بقى إن إحنا كابنات مبيبقاش عندنا رفاهيه الإختيار ،المفروض إنتوا اللى بتختارونا ،يعنى مش هيبقى موت وخراب ديار.
الخلاصه إن ماينفعش تكون فى مصطلحات مُخربه زى 'العنوسه ‘ ومافيش حاجه إسمها تأخر سن الزواج وماتتعبوش نفسكم فى إختراع مصطلحات تبوظ نفسيات من لاحول لهم ولاقوه،ومافيش أى حاجه فى الدنيا حددت ميعاد للجواز أول قال أننا المفروض نتجوز الساعه كام ،كفايه تخريب فى نفسياتنا بقى وسيبوا كل حاجه على حالتها.
لو حابب يبقى فى مصطلح زى 'العنوسه ‘ يبقى المفروض علينا وعليك وعلى يخصك .هتقولى تانى مفيش راجل بيعنس هقولك مراحل عنوسة الأستاذ مصطفى تؤكدلك كلامى لأنها نفس مراحل عنوسة كل البنات.
فاكر ياأستاذ مصطفى لما رفضت تتجوز شيرين علشان كان بوقها كبير وسهير علشان كانت قصيرة ،وأمل علشان كانت تخينه حبتين وولاء علشان كان أبوها على قد حاله مع إنها كانت ماتتعايبش ،أهى بسمه رفضتك علشان كنت مليان حبتين ، وأقولك كمان على سر رفضتك علشان رغاى وبتتكلم عن مميزاتك اللى إنت لوحدك شايفها كتير .
إتجوزوا فى أى وقت ،إتجوزوا لما تحسوا بالراحه،إتجوزوا علشان تستمروا بحب وموده ورحمه مش علشان تعملوا شكل إجتماعى خوفا من كلام الناس.
العنوسه لفظ ممكن يموت بنى أدم من كتر القهر، عيشوا الحياة ببساطة.