نصائح لتوفير مصاريف «صيانة العربية»: ماتشتريش جديد.. هات مستورد مستعمل

أصبحت السيارة عبئاً على صاحبها، ففى هذا التوقيت الذى ارتفعت فيه أسعار كل شىء، أصبحت مصاريف صيانة وإصلاح أعطال السيارات تفوق قدرات البعض، والميزانية التى يخصصها مالك السيارة لها أصبحت غير كافية، فلجأ الكثيرون إلى وسائل مختلفة توفر عليهم فى المصاريف، أولها عدم الذهاب للتوكيل، والبحث عن بدائل لإصلاح سياراتهم بأقل تكلفة.
ارتفاع الأسعار يدفع البعض للبحث عن بدائل أوفر
عندما تعرّض «الإكصدام» الخاص بسيارة عمر علاء، للكسر، أول قرار اتخذه هو عدم الذهاب للتوكيل والبحث عن بدائل أخرى، حتى توصل إلى شراء «إكصدام» استيراد مستعمل: «كل توكيلات العربيات غالية، وأنا ليه أصلح أو أشترى منه، مع إنى ممكن أجيبها استيراد مستعملة بس نضيفة؟ وبدل ما أجيبه بألف جنيه أشتريه ب300 جنيه وسليم».
هناك بعض الأمور التى قد تكون عائقاً عند شراء المستعمل لكنه يتخطاها: «يعنى ممكن ألاقى الحاجة اللى أنا عايزها مستعملة بس مش نفس اللون، فبضطر أجيبها وأرشها بعد كده». ومن أجل التوفير، يحرص «عمر» على عدم القيام بصيانة للسيارة أو إصلاح قطعة بها إلا بعد انتهاء صلاحيتها نهائياً: «يعنى مثلاً الكاوتش كان محتاج يتغير، بس سيبته ومشيت به فترة طويلة رغم الخطورة عشان ممكن يتقطع على الطريق، لحد ما يبقى معايا فلوس واقدر أغيّره»، وهو الأمر الذى يفعله مع كل قطع السيارة من البوجيهات إلى تيل الفرامل: «مابصلحش حاجة إلا لو العربية وقفت تماماً».
بعد أن كان يحرص محمد خميس، 30 عاماً، على إجراء صيانة سيارته وتغيير زيتها والكشف عليها داخل التوكيل، قرر منذ فترة أن يبحث عن بدائل أكثر توفيراً بجودة متقاربة: «بطلت مشوار التوكيل، لأنه أغلى من بره بكتير، وعلى الرغم من إنهم بيركبوا القطعة الأصلية لكن اللى شغالين عندهم مش صنايعية».
قرر «محمد» تغيير زيت السيارة خارج إطار التوكيل، وهو ما وفّر معه 200 جنيه: «كان فى التوكيل ب600 جنيه، بره التوكيل ب400 جنيه»، أما قطع الغيار الأخرى للسيارة من تيل فرامل وغيرها، فقرر تغييرها بالقطع التايوانى من محال وورش مختلفة: «حتى إزاز العربية غيّرته بمعرفتى، لأنى كمان سألت عليه فى التوكيل قالولى مش موجود وتستنى نجيبه، فغيرته بره وأرخص ومستحمل معايا».
عندما عانى مصطفى سلامة، 28 عاماً، من سماع صوت خارج من «عفشة» السيارة، لم يلجأ إلى التوكيل لحل المشكلة: «إذا الصيانة بره غالية جداً أمّال التوكيل كام؟! بيبقى أغلى 3 مرات، وأنا كان عندى مشكلة فى الموتور كمان مش العفشة بس»، البحث عن ميكانيكى جيد هو المطلوب فى حالة الاستغناء عن التوكيل: «لكن لازم توصل لحد كويس، لكن فى المجمل لو هدفع 3 آلاف فى التوكيل، يبقى ممكن الميكانيكى ياخد ألف بس».