الساعة لسه ما جاتش واحدة بعد نص الليل
قلبي غفّل ثانيتين شافك
مع إنه شارب قهوة تكفيه كام سنة
غفّل وساب روحي تسند على كتافك
واحدة إلا خمسة بالتمام كُنتي
بتضحكي
فجأه القمر خافك
من قد إيه بطلنا نضحك كده؟!
يااااه!!
سنتين ويوم!
الهُدنة بينا طوّلت
فبعدنا أكتر م اللزوم
هرجع غريب
وهترجعي زيك زمان
زي السما من غير غيوم أو اتربة
بُصي عليا من مكانك
قلبي مليان كركبة
محتاج لنظرة ترتبيه
وتنضفيه من كوم تخاذل
وتشجيعه يقدر يواجه كل شيء
مش كل من يهرب ساعات من حضن حد بيعشقه
بقى مش جريء
يمكن غريق
والحضن ده هينزله لقاع الفُراق
البحر مش مضمون قوي
البحر من كُترة هموم الناس عليه
طبيعي نلقى خلقه ضاق
وبدال ما يرفي جرح فيا من حبيب
ألقاه بيرميني اشتياق
وأنا مش صبور
مش هقدر اتحمل أنا فُرقة وغرق
سنتين ويوم بصحى وبنام
على صوت قلق
وخبط على جدارن ضلوع متهشّمة
باخد قرار وابعد تجاهك سِلّمة
وفجأة ألقاني بتعكبل
فبستهبل وأقول آسف
وقعت بقصدي في عيونك
بحبك بالمناسبة صحيح
بحبك.. ربنا في عونك
بحبك حب م اللي بجد
بحبك حب مش لونك
******************
نرجع سوا فلاش باك
من قد إيه؟!
سنتين ويوم
الساعة واحدة إلا خمسة بعد نص الليل
آخر مكالمة ما بينا تقريبا
- ازيِك؟!
= بقيت زيّك
= بتكُح ليه؟!
- دُخان فراقنا مُستجد
فطبيعي اتصاب بالسعال
= هو إنت ليه حبيت بجد؟!
- هو إنتي ليه بتكرري نفس السؤال؟!
حبّيت طبيعي والنصيب لِعبة
= حاسس بإيه؟
- نشوة خسارة من حياة صعبة
= أصعب عليك من حضن ضاع؟!
- أصعب عليا كمركبة
بتعافر الموج وحدها من غير شراع
بس إنتي ليه خدتي القرار؟!
= معرفش ليه
أقدار
- إحنا كده
بنحمل القٙدٙر الهروب
وبقينا صورة لشخص جوّه برواز من دهب
والشخص ده مليان ندوب
حتى ملامحه اتغيّرت
= هقفل.. سلام
- كان فيه هنا قبل الكلام
أحلام كتير اتبعترت
*******************
واحده إلا خمسة بعد نص الليل؟!
لأ..
الوقت عدّى وأنا تحت تأثير القمر
كان جسمي مفرود ع الأرض باصص للنجوم
وحنين غريب طاير فوقيّا بدون سبب
بيخش زوم
فبيكشف إني لّسّه أبعد م التعافي
إخفاء جراح تحت الهدوم علشان تخِف
مش شرط كافي
فيه لسه باقي مرحلة موصلتهاش
يمكن تكون حابة تجمع ذكريات
حاصرتني فجأه بس أنا
ما حصرتهاش
يمكن يكون كان حضن منك بس أنا
فضلت أهرب وقتها
ع العموم
أنا قلبي متأكد وعارف
إن فيه أحضان كتير
وأكيد هتيجي برزقها