أنا ومعالى الوزير

أنا: إنجاز عالمى لوزير التعليم ومكافأة عالمية، اضغط إدخال للحصول عليها.
معاليه: يا بركاتك جائزة قراراتى الجديدة «إدخال».
أنا: جات يو ‘got you' وقعت يا معاليك.
معاليه: إنت مباشر معايا إزاى؟ وإيه اللى حصل فى الكمبيوتر؟
أنا: عاملة حاجة لو عرفتوها تبقوا عمد، اسمها هاكين الكمبيوتر بتاعك، زى القرصنة بالضبط.
معاليه: يعنى إيه؟ المفروض أسمعك؟
أنا: فى السريع كده أكُرّ ليك الشريط.
معاليه: آه يا عفريتة، اتكلمى يا بنتى.
أنا: 25 سنة مؤبد حكم علينا بتغيير فى نظم التعليم ومواده بالعبيط، ممكن إفراج مع الرحمة؟
معاليه: آه طالبة فاشلة بتشتكى.
أنا: عيب عليك، إحنا من كجى ون مطحونين، ارحمونا من غزالتكم اللى ساعة تروح وساعة تيجى، وأنت وأهلينا بتقولوا علينا فاشلين، نفسى تمتحنوا ونتأكد من نجاحكم.. نهاية كده يا ريت ترجع نظام التعليم لعهد رفاعة الطهطاوى و وسيبك من زكى جمعة ده بتاع مدرسة المشاغبين ها!
معاليه: أستاذ زكى جمعة سبب نهضة التعليم يا ناكرين الجميل.
أنا: حسبنا الله ونعم الوكيل، وقتك خلص يا حد طيب جدا.
معاليه: كلنا تلاميذ زكى جمعة وخلفه على الدرب مسيرين.
أنا: الحمد لله فيه آى جى والدبلومة الأمريكية والألمانية والفرنسية يا ريت تضيفوا الدبلومة الصينى عشان مافيش أنظف من الصينى.
معاليه: والله فكرة.
أنا: انتو فعلا مسيرين لتدمير التعليم، يا حد طيوب قوى.
معاليه: أى خدمة.
أنا: حتى النت هنجت.