إللى عنده دم أحسن من إللى عنده دقن

(إذا حققت النصر فليس مطلوباً منك أن تبرر ذلك، ولكنك إذا هزمت فمن الأفضل ألا تكون موجوداً لتبرر ذلك) عارفين مين اللى قال الكلام ده؟ أدولف هتلر عارفين معنى الكلام ده إيه؟ يعنى لما الواحد يفشل فى حاجة يتنيل ويختشى على دمه ويسيبها للى بيفهم مش يقعد يقاوح ويكابر ويكدب ويبرر ويدورها بلوى الدراع، هتلر ده اللى حارب وقتل وكان الدم عنده عادى وماكانش عنده قلب، طلع عنده دم ومايقدرش يستحمل أنه يكون موجود عشان يبرر فشله وانتحر.
والله يا جماعه فى الظروف المنيلة اللى إحنا فيها دى ما بقتش عايز أقوم من النوم، بقيت بنزل تحت البطانية وأنا مقرر انى هطبق نوم، يعنى لو نمت الخميس ببقى نفسى أصحى السبت أو الحد عشان يفوتنى أكبر كم ممكن من المصايب اللى بتحصل كل يوم وجابتلى اكتئاب، والغريب إنى لما بصحى بلاقى مصايب أكبر وأكتر وأهم وأنيل من المصايب اللى فاتتنى (الشعب مش طايق الحكومة.. الحكومة بتكذب وتسحل الشعب.. شرفاء بيتقال عليهم بلطجية بلطجية بيتقال عليهم شرفاء) كل ده كوم وعداد الشهداء اللى بيزيد كل يوم ده كوم تانى، لدرجة انى بدأت أحس إن دى خطة الحكومة الجديدة لدعم وزيادة عدد أعضاء الهيئة اللى عملوها لشهداء 25 يناير اللى أنا أصلاً مش عارف اسمها ولا حد عارف إيه لازمتها وبتعمل إيه للشهداء أصلاً.
تخيل لو كنت صاحب شركة وقررت تعينلها مدير بشكل ديمقراطى وعملت انتخابات نزيهة واللى فاز بالمنصب هو اللى وعد الموظفين أنه هيعمل كل حاجة عشانهم، ولو قاموا ضده فى يوم من الأيام وطالبوه بالرحيل هيمشى فى ساعتها دون قيد أو شرط، وبعد 6 شهور تأكد الجميع من فشله فى إداره الشركة وانحيازه لأهله وعشيرته وطالب الكل برحيله وقررت كصاحب شركه إنك ترفده.. ورفض!!!، مش كده وبس لا، ده بقى بيجيب ناس من شركات تانية عشان يضربوك انت والموظفين اللى عندك عشان تكونوا تحت أمره ومهما تحتج أو ترفض أصبحت انت المتهم والغلطان عشان انتخبته، وبقى يخطط بس إزاى ياخد الشركة هو وأهله وعشيرته.
وآدى حالك وحالنا يا مصر بقينا بنتعرى ونتسحل فى شركتنا قصدى فى بلدنا، طب إيه؟ هو فيه كده؟ طب أنا هافترض اننا شعب رخم ومش بنزهق من الزن، إنتوا مابتتعبوش من الكذب ولا بتضايقوا من اللى بتسمعوه أو بتشوفوه مننا كل يوم؟ ده اللى كان قاعد 30 سنة ماستحملش 18 يوم ومشى، انتوا ياللى ماكملتوش سنة خلاص؟ لزقتوا؟
عموماً أنا حابب بس انى أقول لحضرتك يا سياده الرئيس أن إرادة الشعب أقوى من أى شىء وأى حد، وعشان أكون أكثر وضوحاً أنا كلامى أصبح مش موجه لحضرتك لوحدك لا، ده ليك انت وأهلك وعشيرتك، وعموماً قدامك حل من الاتنين يا تعمل زى مبارك اللى انسحب واتسجن يا تعمل زى هتلر اللى اختفى وانتحر، شوف انت بقى.