منة هشام تكتب : قشر البندق والدهب القشرة

الرائع حميد الشاعري قبل حادثة فيلم "أيظن" الذي اتمنى من الله أن يكون عاد عوداً حميداً إلى رشده بعد تمثيله، كان له أغنية وفيلم مشهورين باسم "قشر البندق".
الاغنية كانت كلماتها تقول: "آه قلب البندق آه لا قشر البندق لآ قلب البندق حبوه آأأأأاهوووه قشر البندق يرموه أأأأأأؤووه "
اغنية بتصيبنى بالبهجة مكنتش بفهم الفيلم لما كان بيتذاع وانا صغيرة بس كنت بحبه، ولما كبرت بطلو يذيعوه وللأسف بقوا بيذيعوا مكانه "أيظن" !!!
أما بالنسبة للدهب القشرة أو الصيني اللي زي كل حاجة في حياتنا مبهر و لامع من بعيد وبيخدع الناس بس هو في حقيقته فالصو رخيص.
علشان كده اتعودنا نستبدل في حياتنا الحاجات اللي بتلمع اللي بتجذب الناس اللي بتديهم صورة انك واد محصلتش بغض النظر عن قلب البندقة.
بتخلي مشاعرك قشرة احساسك قشرة كلامك قشرة عشان تعرف تعيش وسط الناس القشرة في الحياة القشرة.
بقيت انتا نفسك قشرة وفرز تاني كمان، تيجي على نفسك عشان ده، وتنافق في ده، وتجامل ده عشان حسابات حياتية بحتة.
بس بيجي عليك الوقت اللي مبتعرفش تتخلى عن القشرة اللي انتا جواها .
ياريت القشرة دي تكون حماية للحاجات الحلوة اللي جواك، يعني تحافظ على قلب البندقة من الكسر ومتخسرهوش، وده الفرق بين قشرة البندق والدهب القشرة ..قشرة البندق بتحافظ على قلب البندقة وطعمها، بتحفظ على حاجة حلوة، لكن الدهب القشرة ..قشرته مجرد حاجة بتدي لمعة زائفة لمعدن رخيص.
قلبك لو سليم هتعدي متبقاش من جوه وبره فالصو، أو متخليش الفالصو يبهت على قلب البندقة.
الناس لما بتشتري الدهب القشرة بتشتريه عشان لمعته اللي أول ما بتبهت بيترمي وبيتجاب غيره .
متسمحش لنفسك تستخبى جوة قشرة ليها وقت وتبهت، خليك اصلي متبهتش مهما حصل، الناس هتشتريك بالغالي، وهتقدر قيمتك عشان عارفة انك غالي ولمعتك فيك طول العمر، وانت كمان هتبقى عارف ان الناس دي تعبت عشان تكسبك .
الناس بطلت تدور على قلب البندق عشان التدوير بياخد وقت، وبتستسهل وتاخد القشرة، دلوقتي متكونش منهم ولو لاقيت حد كويس مش مجرد قشرة بتلمع امسك فيه مهما تعبت عشان توصله الغالي تمنه فيه .
اسفة اني وصلت المعنى بأسلوب مادي بس فعلا الناس دلوقتي بقت بتتفاهم بالماديات.. اكتر من قلب البندق.. وشكرا حميد الشاعري
.
https://www.youtube.com/watch?v=XlsIyqvZMCQ