قصيدة " لو كان يجوز "

قلبى الغريب فيك ياوطن
أصبح غريب جوا البدن
طرح الشجر
ما بقاش بينده ع الطيور
وقت الحصاد
حتى الحنين أصبح رماد
والنار بتاكل كل أخضر فى القلوب
فأزاى أتوب
ع الشخبطة فوق الورق
عن رسم صورتى ع الحيطان
بدون ملامح أو رموز
لو كان يجووز
أنا كنت هرسم صورة لعيال عريانين
بس الخجل
خلانى أشخبط ع النهود
عن عضو تانى ف الولد
بس البلد
الكل دايق خصرها
طول عمرها
تعمل شريفة عندنا
أكمننا حالفين ما يبقى فى الحرام
أحنا الحروف إحنا الكلام
اللى بيقلق عرشهم وقت المنام
وأزاى ننام
والدم سارح فى المكان
الدم لسه ع الإيدين
الدم دين
حالف ما يطلع م الكفوف
حالف يطوف
جوا العيون السهرانيين
حالف يخبط ع البيبان
ويسيب صورهم ع التراب
يمكن يثور
يمكن يشوف
كل الحقايق والصور
من غير رموز
لو كان يجوز
أنا كنت هرسم حضرتك
وأنتى ف سرير الجماع
وإزاى قبلتى بحضرته
وهوا بايعك للى باع
الحلم فى قلوب البشر
لساه هيقدر يتوصل
من تانى هيعود لليمدان
ويعيد حسابات الوطن