تلاتين سنة

عشت أرضع فيكى خوف
كنت بحبى فوق ترابك
لما أسمع صوت غرابك
ألقى شعرى لونه شاب
ألقى صوت الضحك غاب
قبل ما أنطق بالكلام
ولاّ أعرف إيه علام
رضعونى الخوف حروف
كل ما أكبر
ألقى الخطاوى بين دروبك
منى تاهت
كل ما أكبر
ألقى الأمل فى عيون غروبك
لونه باهت
قبل ما أفتح عيونى
علمونى
إزاى أنافق
إزاى أسقف
أقول موافق
أرقص أغنى مع الدفوف
خطوة خطوة تاتا تاتا
جبت صندل نوعه باتا
رحت أمشى رحت أخطى
علمونى إزاى أوطى
طعم ضحكى كان برىء
قالوا إوعى تكون جرىء
يدبحوك زى الخروف
رحت المدارس ابتدائى
نشيد عروبتى كان غنائى
غيروا لينا المناهج
شخبطوا لون انتمائى
قالوا المبادئ فكر صادئ
شىء مكرر
والضمير دا شىء خطير
مبقاش مقرر
والتاريخ حسب الظروف
علمونى أحفظ أصم
أقفل سنانى بوذى أضم
قالوا اسكت لو تشوف
أى غش إياك تهش
أو تقول تزوير كشوف
قعدت أقرا سهرت أذاكر
قلت أحلى يبقى باكر
كنت فاكر
إنى هقبض بالألوف
خدت الشهادة رحت جامعة
ولقيت عيونى بفرحة لامعة
شفت الحرس راكب فرس
مانع أذانك والجرس
صوتنا انخرس
وانغرس
خنجر اليأس فى جروحى
وانطفت شمعة طموحى
لما قالوا
استنى دورك فى الصفوف
خدت المؤهل وبقيت شباب
سدوا فى وشى كل باب
شفت الرشاوى والوسايط
والفساد دخانه شايط
والشوارع نورها زايط
والمراكبى جايب عبايط
مش عارفة إيه معنى الكسوف
تلاتين سنة
نفس الفراعنة والوشوش
راكبة الكراسى والعروش
ناهبة القروش
مالية الكروش
راسمة الصور فوق النعوش
نفس الملامح والنقوش
دول ديابة مع الوحوش
نسور سكنوا القصور
خلونا نسكن فى الكهوف
تلاتين سنة
ما كنتش أعرف أزور أماكنك
تايهة منى خيوط مساكنك
عطشان محبة جعان لخيرك
كنتى ترمينى لغيرك
قفلتى عش فى وش طيرك
والغريب فيكى يطوف
تلاتين سنة
والحلم جواى كان يموت
والأمور كانت عجيبة
ع الكفن بدفع ضريبة
واللى داخل جوا قبره
يدفع رسوم علشان يفوت
ولما أرفع أى صوت
كنت آخد بالكفوف
تلاتين سنة
عشت أرضع فيكى خوف