دار المسنين

بتلم ليه الهدمتين والطرحتين
والشبشبين ..؟
ماتقوللي ياابني .. واخدني فين ..!
علي بيت جديد ..!
مين اللي قال أنا عايزه ياابني بيت جديد
البيت دهُه
أنا عشت فيه خمسين سنه
مش عاوزه غيره أي بيت ..
إسأل بلاط الأرض .. وأسأل كل حيط ..!
أنا جيت عروسه صغيره وقعدت فيه لمّا إتحنيت
مااعرفش غيره أي بيت ...!
أنا عشت ياابني سنين هنا
وأتمنى أموت برضك هنا
علي فرشتي .. ومخدتي
والبطانيه واللحاف
أفتح عينيّ كل يوم ..
وأقفل عينيّ كل يوم
علي إيد أبوك بتضمني ف صورة الزفاف ...
بتدّفي قلبي وتحضنه ف سنين عجاف ...
وانا عارفه ياابني إنْ خَدتني البيت الجديد
أنا راح أخاف ..
وانا ياابني مش عاوزه أخاف ..!
ف الأوضه دي
أنا لسّه عايشه ويّا أبوك .. عمري اللي فات
أصل الحبايب لو سابوك بيعيشوا فيك بالذكريات ...
خليني ياابني ويّا أبوك
أصحى .. وأبات ..
وأعيش معاه باقي الساعات
واشم ريحته .. ف الحاجات
مين اللي قاللك .. إنه مات!
لسّه البدل جوّه الدولاب
جنب السرير آخر كتاب ..
ولسّه سجادة الصلاة
والسبحة فوقها منوّره
ولسّه باسمع ضحكته ..
وسط السكات !
أنا عايشه يابني بحاجة أبوك .. متونّسه
وبدخلتك ويّا العيال .. متونّسه
وانا عارفه ياابني ..
ان خدتني البيت الجديد
راح أتنسي
وانا ياابني مش عاوزه
أتنسي ..!
فإن كنت محتاج الوسع
لاجل .. العيال .. هات العيال
انا عندي ياابني .. سرير كبير
حاارقد علي حرف السرير
واسيب لهم باقي السرير ...!
وان كنت محتاج السرير ..
خد السرير..!
إن شالله أنام فوق الحصير
لكن أنام وسط الأمان ..!
خليني ياابني وسطهم
قدّرني ( واحده ) منّهم باقي الزمان ..
وماهوش كتير
وحياتك أنت .. ماهوش كتير ..!
أنا مش حااعيش أدّ اللي عيشته ..
ولانفسي أعيش بعد اللي شفته ..!
كمّل جميلك .. وأستر الباقي ف حياتي ..!
أناعمري ياابني قصاد .. عينيك
فرّطت ف أمي أو حماتي ؟!
ماتقوللي إيه خلاني ياابني .. أهون عليك ...!
وساحبني ويّا الهدمتين ..
رايح تسلمني .. بإيديك ..!
فرّطت ف أمك ..!
قوللي ليه ؟!
أنا عمري يوم ..
فرّطت فيك ؟!
إن كان علي ضيق المكان ..
ماانا قلتلك خد السرير ..!
وإن كان علي ضيق المعيشه
أبوك سايبلي معاش كبير..!
قسّمته ياابني من زمان النص ليك ..
و الربع مصروف العيال ..
والباقي مصروف الدوا ..!
لكن خلاص وحياة عينيك ..
ماعاد حايلزمني .. الدوا ..!!
خد .. المعاش ..
كل المعاش ..!
لكن
بلاش
ترميني ف البيت الجديد ..
وأحس إن ربايتي فيك راحت ..
بلاش ..!
:(