اعترافات وحركات عيال

بقلم : احمد عبد الله .. كابتن احمد
زمان تعالو نفتكر وتحكى لينا حركه عيال كنت بتعملها زمان متتكسفش وفضفض
وخلينا نرجعك شويه لزمان وليس على العيل حرج هنزل حركتك ضمن حركات العيال
لو كلامك وتعليقك عجبنى وحركتك كانت حركات عيال
وانا هحكى لكم عن شويه حركات اعترف انى كنت بعملها بس محدش يضحكواكيد
انتو برضو كنتو بتعملوها او عملتو اى حركه منهم
1-رش الميه من الخرطوم وتغرق اللى رايح واللى جاى ونغرق الارض لحد ناس متتزحلق
2- تقف على عربيه الفول تضرب واحد بالزيت الحار مع فحلين بصل وقرنين فلفل
اخضر واديها مترحمهاش وولع يا ريس وناكل ونخلص للراجل على الجرجير والفجل
والبصل
3-الجرى ورا الاتوبيس واللى عينو ونظره بيجيب لبعيد اول واحد يجرى هب
يروح الكل جارى وراه وبعد ميتقطع قلبك لانك مبتشفش تلاقيه مش اتوبيسك
وجايز تركب كمان ههه
4-تعمل انك صايم فى رمضان وانت صغير وتطس وشك بالميه ومفيش مانع تشرب
شويه تبل ريقك مهو الدنيا نار وربنا غفور رحيم ومكنش قصدى هههههههه
5-حدف البيض من فوق السطوح على اللى رايح واللى جاى وتستخبى وتطلع تجيب
بيضه لامك من عشه الفراخ تحدف يجى خمس بيضات قصادهم وتاخد حته علقه موكن
6-وانت واقف ع الناصيه اى عيل مش عجبك ومعدى تشنكله كنت وش اجرام ههههه
7-البنطلون لو اتقطع كنت تقلع القميص او الجاكت وتربطه على وسطك لحد مبقت
موضه وبقى اصلا الشباب يسقطو بنطلونتهم جابو يعنى م الاخر ههههه
8-من كتر حبى فى السيرك والراجل بتاع حدف السكاكين اللى بتفرج عليه فى
الموبيت شو والقناه التانيه كنت مالى البيبان تخريم بالشوك شغال وسكاكين
المطبخ حتى البراجل والمسامير الكبيره وبردو كنت اخد علقه ....طفل
مبيهمدش ؟؟
9- البمب من فوق على راس اى حد ماشى ف الشرع او افرقعها جمبو واللى معاها
زيت يتدلق واللى جايبه فول يتبحتر واللى معاه شنطه ولا بطيخه تتكسر وطبعا
تستخبى وتسمع شتائم ملهاش حصر ولا عدد وانت بتضحك وفطسان على نفسك م
الضحك
10-نخش نصلى واحنا عيال ويا سلام لو وقع قلم من جيب اى حد كبير نخدو
وننسى الصلاه ونفضل نشخبط على ايدينا ورجلينا ونرسم ساعات وعقارب وحركات
....عشان كده من كتر الشخبطه بقيت ارسم كويس لانى كنت مالى البيت شخبطه
وميكى وسمير كان لازم احل اى لغز فيهم واحل اى متاهه والون واشخبط شخابيط
كفايه عشر حركات منتظرين حركاتكم عشان نحطها ونكمل حركات العيال
تعيشو وتفتكرو ومش عاوز لايك عاوز تعليق لحركات كنت بتحب تعملها وانت عيل
والحركه بركه واديها طلعت منك مهندس ودكتور ومدرس وعالم وجايز وزير ومدير
ورئيس كلنا جوانا عيل صغير حتى مع اولادنا بنحن ونحب نكون عيال وما احلى
الرجوع اليه
اشوفكم بعد صلاه الجمعه
كابتن احمد