حاول استغلال زوجة أخيه جنسيًا.. فمات على يد أشقائها

«كان بيلعب بدماغ جوز أختى وكان عايز يخرب عليها، ويخلى جوزها يطلقها عشان هو كان بيعاكسها، وهى كانت بتصده، وأكثر من مرة اشتكت لنا، وأحنا كنا بنهديها عشان ما يحصلش مشاكل بينها وبين زوجها بسببه، لغاية ما فى يوم هددها إنها لو ما سمعتش كلامه ورافقته هيقول لجوزها إنه شافها مع راجل غريب وهيخليه يطلقها، فكان لازم نتخلص منه قبل ما يخرب على أختنا».
بهذه الكلمات بدأ المتهمان بقتل شقيق زوج أختهما الاعتراف أمام المستشار عبدالحميد الجرف رئيس نيابة حوادث جنوب الجيزة، بعد قيامهما بقتل «أ. س» 27 سنة، عامل، شقيق زوج أختهما بسبب خلافات عائلية بفيصل.
وقال المتهمان فى اعترافاتهما: «أختنا استنجدت بنا عشان نشوفلها حلًا فى شقيق زوجها اللى كان بيعاكسها وبيضايقها كتير من يوم ما تزوجت أخوه، وعشان أختنا واعية وعاقلة معرفتش جوزها فى الأول بمضايقات أخوه لها ومعاكسته لها اللى كانت بتوصل فى بعض الأحيان لأنه بيلمس أجزاء من جسدها».
وأضاف المتهمان: «إحنا كنا بندافع عن أختنا وعن شرفها وما كنش قصدنا إننا نقتله بس هو شيطان واتكلم معانا ببجاحة وقلة أدب، وأختنا لم تلجئ إلينا إلا لما هددها إنه هيخرب بيتها وهيخلى جوزها يطلقها لأنه هو أخو زوجها الكبير، وبيسمع كلامه فى أى حاجة».
واستطردا: «أختنا لجأت الأول لوالدتنا عشان تقولها عن مضايقات شقيق زوجها لها فكانت والدتنا بتقولها اصبرى وبلاش تقولى لزوجك عشان متحصلش مشاكل، وعشان جوزها بيسمع لكلام أخوه الكبير، ونصحتها إنها تحاول تتكلم مع شقيق زوجها وتقوله إنه ما يصحش اللى بيعمله، وإنه بكده بيخون أخوه، وبالفعل نفذت أختنا نصيحة والدتنا لها واتكلمت مع شقيق زوجها، لكنه لم يهتم لكلامها وهددها إنها لو مسمعتش كلامه هيتبلى عليها ويقول لجوزها إنه شافها مع راجل غريب وهيخليه يطلقها».
واختتما المتهمان: بعد ما صرح شقيق زوج أختنا بنيته وهددها إنه هيخرب بيتها وهيطعن فى شرفها، لجئت لينا وصارحتنا بمضايقات شقيق زوجها، روحنا عشان نتكلم معاه راح اتكلم معانا بقلة أدب، واستفزنا وحاول الاعتداء علينا فدفعنا عن نفسنا وضربناه بسكينة كانت بحوزتنا فى صدره فسقط على الأرض، وهربنا أحنا بعد ما تأكدنا إنه مات، بس أحنا ماكناش عايزين الشر له، أحنا كنا بندافع عن شرف أختنا وحياتها».
العميد عبدالحميد أبوموسى رئيس مباحث قطاع غرب الجيزة كان قد تلقى بلاغًا يفيد بمقتل «أ. س» عامل، نتيجة إصابته بجرح نافذ بالصدر فى منطقة فيصل، وبانتقال رجال المباحث إلى محل الواقعة، تبين أن المجنى عليه نشبت بينه مشادة كلامية وبين زوجة شقيقه، فاستدعت الزوجة أفراد أسرتها لمناصرتها، وتشاجروا مع المجنى عليه، ما أسفر عن إصابته بجرح نافذ فى صدره أدى لوفاته فى الحال، تم تحرير محضر بالواقعة، وإخطار النيابة التى أمرت بحبسهما 4 أيام على ذمة التحقيقات.