المتهم: سرق تحويشة العمر.. والجيران: ارتاح من زوجة الأب تجرد زوج وزوجته من كل مشاعر الرحمة والإنسانية، وعذبا ابن الزوج حتى لفظ أنفاسه الأخيرة، بعد أن اتهماه بسرقة مبلغ مالى من غرفة النوم. وقال المتهم الرئيسى فى القضية، الأب «محمد.ى»: فوجئت بزوجتى تخبرنى بأنها مش لاقية الفلوس اللى أحنا محوشينها فى مكانها، فى غرفة نومها، ولما قلت لها دورى عليهم كويس، قالت لى دورت عليهم ومش لاقياهم، فقلت لها: يبقى راحوا فين، ما حدش بيدخل الشقة غيرى، أنا وأنتى ومفيش حد بيزورنا ولا حد يعرف أننا حاطين فلوس فى غرفة النوم، راحت قالت لى «لا الولد يعرف مكان الفلوس وأنا أمبارح شوفته فى الأوضة». وأضاف المتهم «استغربت وقلت لها إنه لسه عيل صغير هيعمل إيه بالفلوس، قالت لى هو كان نفسه فى موبايل غالٍ وقالى إنه عايز يجيبه، بس أنا قلت له مش معايا فلوس فيمكن يكون خد الفلوس من ورانا عشان يجيب الموبايل». وأكمل «بعد ما ناديت على الولد وقلت له أنت خدت الفلوس من غرفة نومنا، أنكر لكنى حسيت من عينيه أنه كداب، وأنه هو اللى خد الفلوس، فانهلت عليه بالضرب عشان يقول لنا على مكان الفلوس لكنه كان رافض يقول ودا الفلوس فين». وقال «اتفقت مع مراتى أننا ناخد ابننا ونروح على بيت جدته عشان نعرف نقرره بمكان الفلوس، وبالفعل خدناه على بيت جدته عشان محدش يقدر يحوشنا، وعلقت الولد على باب الأوضة وبدأت أضربه عشان يقول على مكان الفلوس، لكنه كان مصممًا على الإنكار وأثناء ضربى له توقف الولد عن الصراخ وقطع النفس خالص، حاولت أنى أفوقه وأرمى على وشه مياه لكنه مكنش بيفوق، روحت واخده على المستشفى وأخبرونى هناك إن الولد مات من كتر الضرب». وأفاد عدد من الجيران بأن الطفل غلبان ومظلوم وأن زوجة أبيه هى اللى مفترية وبتكره الولد وعلى طول بتتهمه بالباطل، وقالوا «أهو خلاص الطفل مات وارتاح من العيشة مع أب مفترى وزوجة أب متعرفش ربنا». تلقى قسم شرطة السلام ثان، إخطارًا بوصول جثة المجنى عليه بلال محمد، طالب بالصف السادس الابتدائى، أثر إصابته بكدمات وسحجات باليدين والساعدين والكتف والساق وخدوش متفرقة بالجسم. وتبين من تحريات الأمن أن والد الطفل ويدعى «محمد. ى»، وزوجته وجدة المجنى عليه واثنين آخرين، عذبوا الطفل حتى الموت، بعد أن شكت زوجة أبيه فى سرقته 5 آلاف جنيه تخصها.
وأسفرت التحقيقات أن المتهمين قاموا بتعليق المجنى عليه على باب غرفة النوم، وتعدوا عليه بالضرب حتى لفظ أنفاسه الأخيرة، تم تحرير محضر بالواقعة وإخطار النيابة، التى أصدرت قرارها بحبس المتهمين 4 أيام على ذمة التحقيقات.
