قالت سحر المانسترلى، أمين صندوق الجمعية، المشرفة الأساسية على أغلب النواحى الإدارية بها، إن هناك أشخاصاً، لم تسمهم، لهم أطماع فى الجمعية، هم الذين قاموا بتحفيظ الطفل ما يقوله من ادعاءات أنه تم الاعتداء عليه، مشيرة إلى أن والدى الطفلين المعتدى والمعتدى عليه تصالحا بمعرفة الشرطة، وأنه تم توقيع الكشف الطبى على الطفل فى 3 مستشفيات، أثبتت جميعها عدم وقوع اعتداء عليه، مؤكدة أن الجمعية طردت الطفل الضحية لأن «اللى يقول كده مايلزمناش»، بينما الطفل المتهم بالاعتداء مازال موجوداً لأنه «ابن الجمعية»، وإلى نص الحوار الذى تركته «المصرى اليوم» كما جاء على لسانها باللغة العامية: ■ هل كانت الإدارة على علم بواقعة اعتداء «ج.ش» جنسياً على عدد من الطلاب؟ - ده كان حاجة فى السابق ولكن المحضر اتقفل خلاص واتحفظ. ■ «حاجة فى السابق» تعنى أنكم تداركتم الخطأ، وفعلتم ما يمنع تكرار أو حدوث عمليات شذوذ جنسى؟ - احنا معندناش شذوذ جنسى خالص، وعملنا للولد اللى قال كده كشف فى 3 مستشفيات وكلهم قالوا إنه مفهوش حاجة. ■ وما هذه المستشفيات؟ - لا أعرف لأن الشرطة هى التى حولته إلى المستشفيات. ■ لكن كيف حولته الشرطة إلى مستشفيات رغم حفظ المحضر كما ذكرتى قبل قليل؟ - مش عارفة، ومش مفروض أحكى اللى بيحصل كله، لأن الولد فيه ناس بتحفظه الكلام ده عشان ليهم أطماع فى الجمعية. ■ ومن له مصلحة فى تحفيظ طفل يبلغ 9 سنوات أنه يتعرض لاعتداء جنسى؟ - مش عارفة. ■ وهل هؤلاء الذين يحفظون « ط. س» يفعلون الأمر نفسه مع طفلين آخرين هما « م. ح» و «ى. ن» بأن هناك اعتداءات وقعت عليهما؟ - لا توجد سوى حالة واحدة فقط، والموضوع تم حله، خصوصا أن «ط. س» مش عندنا فى الجمعية ده كان مجرد ضيف. ■ لكن حالتى « م. ح» و «ى. ن» تم إثباتهما فى أوراق تحقيق الإخصائيين النفسى والاجتماعى؟ - ما أعرفش حاجة عن الموضوع ده، وده ما حصلش. ■ وهل الضيف من الممكن أن يقيم فى الجمعية أكثر من 3 سنوات متصلة دون أن يكون تابعاً للجمعية؟ - الجمعية فاتحة دراعها لأى حد ملوش مكان، وأى حد بيقدم ورقه بنقبله جوة الجمعية. ■ لكن الجريدة تملك تقارير طبية تفيد بأن هناك اعتداءً جنسياً وقع على الطفل بالفعل؟ - لأ، ده كلام اتكتب غلط واحنا حلينا المشكلة. ■ ومن إذن الذى كتب تقريراً خاطئاً؟ - أكيد نفس الشخص اللى عايز يستولى على الجمعية، وهو نفس الشخص اللى أكيد قال لكم الموضوع، لكننى لا أعرف من هو، وبعدين أبو الولد اللى اتقال إنه اعتدى، تصالح مع أبو المعتدى عليه. ■ لكن التصالح لا ينفى وقوع الحادث، خاصة أن التصالح فى حد ذاته يعنى أنه كانت هناك مشكلة؟ - التقارير الطبية موجودة و«البتاع موجود» وكله تمام، واحنا موجودين بقالنا أكتر من 40 سنة بنخدم الأطفال، واللى بيحصل ده ما يصحش، ده بدل ما تجيبولنا فلوس من الوزير، أو تبرعات نجيب بيها أجهزة للأولاد. ■ لكن تقرير التأمين الصحى التابع للجمعية أثبت حدوث اعتداء جنسى.. فهل يدخل ذلك فى إطار المؤامرة على الجمعية أيضا؟ - أنا اللى يهمنى إن أولياء أمور الولدين اتصالحوا وخلاص، وبعدين الولد اللى قال إنه تم الاعتداء عليه قمنا بطرده من الجمعية وأعدناه إلى أبيه. ■ وهل كان لك دور فى الصلح بين والدى الطفلين ليتنازل والد « ط. ح» عن المحضر؟ - لأ، هم اتصالحوا فى البوليس. ■ ولماذا طردتم «ط. ح» من الجمعية؟ - هو كان ضيفا وقمت بإعادته إلى ولى أمره، وهو طلب أن يخرج من الجمعية، ومن حق أى والد أن يتسلم ابنه اليتيم من الجمعية، وبعدين ما دام فيه ناس بتعرف تحفظ الولد إنه يدعى على الجمعية الكلام ده يبقى الولد ميلزمناش. ■ وهل ترين أن عدم تمسككم بالمعتدى عليه « ط. ح» قد يسىء إلى الجمعية، خاصة أن خروجه جاء بعد إقامة دائمة لمدة 3 سنوات؟ - الأمر لا يسىء لنا على الإطلاق لأننى كما قلت اللى يقول الكلام ده مايلزمناش. ■ وهل الولد المتهم «ج. ش» لايزال مقيما بالجمعية؟ - بالطبع لايزال مقيما بالجمعية. ■ لكن هذا يؤثر أيضا على صورة الجمعية؟ - احنا جبنا مشرفين جدد عشان يباتوا معاهم. ■ لكن طلب مشرفين جدد لم يحدث من الإدارة سوى منذ 4 أيام فقط بخلاف أن أغلبهم لا يتواجد ليلا؟ - معلش بقى، وبعدين الأستاذ عبدالمنعم له أوضه فى المكان والولاد بيقولوله يا بابا وبيحبوه، ثم أنه بقاله 40 سنة أى أن عمره من عمر الجمعية، وألاقى فين حد أمين على الولاد دلوقتى. ■ ألا ترين أن التفاوت العمرى بين «ج. ش» وهو فى الصف الأول الثانوى مع أطفال لا يتعدون العاشرة قد يؤدى إلى وقوع مثل هذه الأمور؟ - اللى حصل قبل كده محصلش فى الأوضة، (ثم استدركت) محصلش خالص أساسا. ■ لكنك لم تجيبى على تأثير التفاوت العمرى، بمعنى هل يبيت الطفل بمفرده أو مع من هم بنفس عمره؟ - احنا عندنا أوض كتير، الجمعية مليانة أوض. ■ لا نسأل عن الغرف.. هل يبيت مع من هم أقل منه عمرا؟ - أكيد لأن مفيش اللى من سنه.. وبعدين ده ابننا.
