البيه البواب ب«يوفق رأسين فى الحرام»

المتهم: الخلايجة فلوسهم حلوة وأعرف بنات ليل وعندى شقة مقفولة.. والدنيا حالها واقف
«أعمل إيه بس، الدنيا حالها واقف ومفيش شغل زى الأول ومش عارف أعيش أنا وعيالى، استغليت أن صاحب الشقة بيسافر كتير فكنت بأجرها مفروشة للخلايجة عشان فلوسهم حلوة ومغرية بصراحة».
صعوبات الحياة والغلاء، كانت مبررًا ل«سعيد.ع»، حارس عقار، التى أدلى بها أمام المستشار هادى عزب رئيس نيابة العجوزة فى اتهامه بتسهيل ممارسة الدعارة للخليجيين، فى تهمة تسهيل الدعارة «القوادة».
وأضاف المتهم فى اعترافاته: «العيشة بقت نار والأسعار كل يوم بتزيد، وأنا مش عارف أعيش، فقلت لنفسى استغل فرصة سفر صاحب الشقة فى العمارة اللى بشتغل فيها وأقوم بتأجير الشقة مفروشة للخليجيين، وكنت بأجر لهم الشقة ب600 جنيه فى اليوم الواحد، بس هما ماكنوش بيقعدوا إلا يومين ثلاثة حسب المصلحة اللى كانوا بيجوا عشان يعملوها، ففكرت فى حاجة تانية تخلينى أعمل أى مصلحة من وراهم، وجاتلى الفكرة اللى عن طريقها أقدر أزود الفلوس؛ كنت بأعرض عليهم أجيبلهم واحدة تقضى معاهم اليوم، وأزود 500 جنيه على اللى كنت باخده منهم، وكمان كنت باخد 500 جنيه زيهم من البنت اللى بأجيبها».
وأوضح «كانت عندى علاقات كثيرة ببنات الليل اللى كانوا بيشتغلن فى الملاهى الليلية اللى قريبة من المنطقة، كنت بأكلمهن وبأعرض عليهن الزبائن الخليجيين، اللى مسكنهم عندى فى العمارة مقابل نسبة باخدها منهم».
وتابع «أجرت الشقة إلى أحد الخلايجة وبعد ما أجرتها له، عرضت عليه أنى أجيب له إحدى فتيات الليل عشان يقضيا مع بعضهما سهرة حلوة وبعد ما أقنعته، اتصلت بإحدى فتيات الليل اللى بتعامل معاها وعرفتها أن فى زبون خليجى مستنى عشان تقضى الليلة معاه، واتفقت معاها على نسبتى، وبعد ما وصلت إلى الشقة فوجئت بمباحث الآداب بتهجم على الشقة وبتقبض عليهما».
كانت قد وصلت معلومات إلى العميد محمود هويدى مدير إدارة مكافحة جرائم الآداب مفادها تورط حارس عقار فى تسهيل ممارسة الرذيلة للساقطات مع خليجيين بشقة فى العقار الذى يتولى حراسته بالعجوزة.
وبالحصول على إذن من النيابة وإعداد أكمنة تمكن الرائدان أحمد لاشين وأحمد أبو السعود من ضبط المتهم، كما تم ضبط ساقطة أثناء ممارستها الرذيلة مع خليجى بإحدى شقق العقار، كما اعترف حارس العقار بأنه قام بتحويل شقة أحد السكان، إلى وكر لممارسة الدعارة، مستغلًا بذلك سفر صاحب الشقة إلى الخارج، مقابل الحصول على مبالغ مالية من الخليجيين والساقطات.
تم تحرير محضر بالواقعة وأخطر اللواء هشام العراقى مدير أمن الجيزة، واللواء خالد شلبى مدير الإدارة العامة للمباحث وباشرت النيابة التحقيق وأصدرت أمرًا بحبس المتهم 4 أيام على ذمة التحقيقات.