بابا... احنا بقينا فى سنه 2022 والميه بقت قليلة أوى وغالية جدًا بسبب سد النهضة = هنعمل ايه يابنى ربنا عايز كده -- يا بابا أنا من دلوقت بفكر فى عيالى لما أخلف... هيعيشوا إزاى والدنيا ناشفة كده ؟ = ليك حق يابنى والله... بس مش قلة المية بس هى اللى هتخوفك -- أومال ايه كمان ممكن أخاف منه غير إن الواحد بقى يحس بالتبذير لمجرد انه عنده رغبة يستحمى = لا هتخاف من حاجات تانية . -- زى إيه مثلا ؟ = الجهل المتفشى فى المجتمع وقلة الأخلاق والفقر غير المبرر ويوم التلات والامتحانات والبرزنتشن - بس ؟ = لا يا حبيبى... والأبواب المواربة والكلام الناقص والوعود اللى ما بتتقلش، وأذى الدنيا وحيرة النفس وحزن الليل وموت الضمير، واللهفة اللى عالفاضى. والوحدة فى اللمة وجفا الأصحاب وشهر أغسطس وفراق ديسمبر -- بابا كفاية = والمعافرة فى السكة الغلط، وعتاب الناس الغلط، والعشم اللى بيقلب بوجع، والانحدار بعد القمة، والحضن البارد، وفقدان السند، وفقدان الشغف، وقلة المزاج، والحلو اللى مبيكملش، والخبث من اللى ظاهرهم محبة. -- كفاية يا بابا أبوس إيدك = والندم فى وقت متأخر، والحضن البارد تانى والإحباطات المتتالية، والتنهيدات اللى بتوجع، والشروخ اللى مبتلمش، وشر الحوجة لناس مبتسمعش، وشر نفسنا والخيانة من أقرب الناس وغدر إللى حواليك حقد ناس، أحلامك إللى بتروح وعمرك اللى بيجرى فجأة. -- بابا انتا لو ماسكتش هانط من الشباك ده أقسم بالله = استنا بس... والتعب من كتر الحزن إلى مالى القلب وحبسه الدموع ف العين والندم على الراح وبحة صوتك ف عز الألم حبك إللى هيخسرك ضحكتك إلى مابتكملش -- الوداع يا بابااااااااااااااااااااااااااا = يا حبيبى يابنى... مات عطشان
