حوار بين طفل ثورجي وأب مثقف

الطفل : بابا يعنى أيه ثورة ؟
الأب : يعنى لما نشوف حاجة غلط نثور ونغضب لحد ما تتحول لصح
الطفل : وأيه كان الغلط ؟
الأب : الظلم والفقر والبطالة واللعب بالقانون والقمع وتكميم الأفواه
الطفل : آه .... طيب ما لسه خالتو مطرودة من الشقة من غير حق ، ولسه الفلاح فقير ومظلوم وعمو وعم أحمد صاحبى مش لاقيين شغل و القضية متلخبطة في قتل المتظاهرين ، وتهديد الصحفيين والأعلام وكمان قضايا كتيرة ضدهم أيه يعنى اللي أتغيير ؟
الأب : هاااا شوية شوية يا حبيبي الدنيا هتهدأ
الطفل : ممكن بس ليه الرئيس بيرجع في قراراته ؟
الأب : السياسة ياما بتضطر لكده
الطفل : آه يعنى ممكن نلعب من تحت الترابيزة
الأب : مش دايما بس أحيانا
الطفل : بس ديننا مبيدعوش لكده
الأب : وأيه دخل الدين في كلامنا ؟
الطفل : أنت نسيت أيام دعايا الانتخابات كانوا بيتكلموا باسم الله والدين
الأب : آه روح ذاكر يا حبيبى
الطفل : كلمتين وهروح فين المتهمين في تفجير كنيسة القديسين ؟
الأب : لسه بس هيظهروا
الطفل : طيب واللي قتلوا جارنا و أصحابه على الحدود في رمضان
الأب : لسه بردو لسه
الطفل : وكمان لسه اللي قتلوا المتظاهرين في الثورة
الأب : أيوه لسه كفاية أسئلة
الطفل : بابا لسه الواسطة والرشاوى شغالة
الأب : دى حاجات متأصلة عايزة وقت عشان نتخلص منها
الطفل : آه وأيه أكبر أنجاز عملته الثورة ؟
الأب : أنها سقطت نظام الظلم اللي دام ثلاثين عاما وجاء برئيس منتخب
الطفل : بس على فكرة ده كان نظام هش وزى الفزاعة وغبي جدا في تصرفاته ومتنساش أن مبارك كان منتخب برضو حتى لو كان بالتزوير والرئيس اللي جابته الثورة متردد وضعيف وناكر الفضل اللي جابوه بشكل أو بأخر يالا ربنا يعديها على خير
الأب : ياااارب
وهم الطفل بالأنصراف ثم توقف قائلآ : بابا المصريين محتاجين ثورة تانية ولا أقولك هي الثورة أصلا مخصلتش الفترة دى بس زى خمود البركان
الأب : عارف يا حبيبى أنجاز الثورة الوحيد
الطفل : أيه ؟
الأب : أنها حولتك بالطريقة دى وبقيت واعى وبتتناقش بالثقافة دى تعالا فى حضنى يا عمرى0