أشوف إعلانك أصدقك أروح شركتك أتجنن

ادفع خمسة جنيه واحجز شقة فى التجمع
التسليم فورى والقسط على ألف سنة
تروح الشركة وأنت منشكح تلاقى موظف سمج يقولك يافندم الخمسة دول جدية حجز والمقدم 100 ألف جنيه وقبل ما تلحق تحول يروح مديك سيكا راحة بس القسط أربعة جنيهات فى الشهر.
ده حقيقى يافندم بس فى قسط ربع سنوى عشرتلاف جنيه
لسة هيغمن عليك يروح مديك القاضية التسليم فورى فعلًا بس للى يدفع كاش أنت ياكلب عشان هتقسط مش هتشوف أم المفتاح غير فى سنة خشرومية إن شاء الله.
معرض سيارات أبو شيماء يقدم لكم العرض المدهش
ادفع ألفين جنيه وصورة بطاقتك ونقسطلك عربية بدون ضامن بدون إجراءات بنكية هتروح سايق العربية.
تروح ياعين امك جرى على ابو شيماء يقولك هات الفلوس اللى معاك وهات عمك وخالك وعمتك وسيب أمك رهن عندنا وامضى على قايمة عفش شيماء بالمرة
الله بس الإعلان
آه الإعلان سحيح هناخد منك الفلوس ونسلم أبو كاش بدون إجراءات
بس انتو موضحتوش الكلام ده
معلش أباشا الإعلان الكلمة فيه بفلوس قلنا لما الزبون يشرف نشرحله ولو لوكلوك نشرحه ولا يفرق معانا.
نسيب دول ونروح لإعلان تانى
استعملى شامبو أبو جلمبو شعرك يسيح عاللى جنبه
استعملى زيت جميلة ومتبقيش بخيلة
خليكى فى السمنة المرملة عشان صحتك يا مدهولة
برشام بكابوظة هيخليكى موزة
والسؤال هنا:
ليه مافيش إعلان بيقول الحقيقة
ليه الكدب ده كله طالما كده كده هنعرف الحقيقة