خيالات عانس

تحرريريريريريريريريريرير
أبو العلا ياسطى
الأجرة جنيه ونص
ماشى ياسطى
قعدت فى الكرسى اللى ورا السواق جنب الشباك وهى بتدعى ان متقعدش جنبها واحدة ست بعيل مبربر
وفعلا جت واحدة ست بإبنها هى فى حرج حطت الشنطة جنبها
المكان ده محجوز يا مدام
طيب ياختى (مع شتايم وبرطمة فى سرها)
العربية اتملت تقريبا مش فاضل غير المكان اللى جنبها
السواق: حاجزة لمين يا ابلة عايزين نمشى
وفجأة ظهر قميص أبيض وبنطلون بلو بلاك الدرجة اللى هى بتحبها متغرقين برفان بس مش لولو جواهم شاب موز جدا
الشاب: ممكن أقعد هنا
:ياخرابى إلا ممكن يعنى شيك وكمان محترم لا مش ممكن
:أفندم
:لا أبدًا اتفضل
بينها وبين نفسها:الله شاب أمور ومحترم كمان لا مش معقول
الشاب طلع الأجرة شافت إيده مافيش دبلة
وكمان مش مرتبط يا بركة دعاكى يا ماما
اممم أنا لازم أتصرف وألفت نظره هو أكيد أخد باله منى وإلا مكانش جه يقعد جنبى مانا عارفة الحركات دى اممم ياترى هيبتدى كلام إزاى
احححححححححححححح الحمد لله الطريق واقف خد فرصتك متتكسفش بينها وبين نفسها
هو شوية كده هيحاول يكلمنى
إوعى تدلقى
لا مش هرد طبعًا من أول مرة لحسن يفتكرنى واقعة
بس ركزى ليطفش
بس لو كررها هرد أحسن ينزل ويختفى وده موز قوى
أيوة اعملى الصح خليكى تتخطبى بقى زى شيماء
آه وأجيب فستان من أتيليه ديدى
يارب ميطلعش قيحة ويدفع إيجار الفستان
ممكن يجيب شبكة عرة
وماله مش مشكلة خلينا نخلص
اه ونخش بقى فى الجهاز
يالهوى دى ماما مش محوشالى حاجات كتير
أحيه أمه أكيد هتعيب على أطقم السرير عشان أمك مجابتش غير 30 طقم بس
الله يسامحك ياما
ولا أخته الرخمة هتقعد تحشر نفسها فى لبسك بقى
لا طبعًا هديها على نافوخها
وهو بعد الجواز هيبقى رخم ويبطل يلبس شيك
آه ويطلعله كرش ويصلع
ومش هيسيبك تلبسى شيك
شيك أيه بقى مانا هتخن وأفشول من الحمل
آه وتبقى وحشة ويقعد يتريق عليكى
نفسيتى تتدمر وآكل كتير
والعيال يجننوكى وهو برة مروق وعايش حياته
تتعبى وتصدعى وعينيكى تبقى فى وسط راسك اللى بيسهل واللى عيان واللى فاشل ولا البت مش سايبة الموبايل
وهو برة ولا فى دماغه
البت تعنس وتقعد فى قرابيزك والواد يشم كلة
وهو يطلقك ويروح يتجوز شيماء اللى جوزها مات
وارجع لوحدى تانى
لا معاكى عيال مقرفين تشيلى همهم
على جنب ياسطى لو سمحت
احنا لسة فى المظلات يا أبلة
آه معلش أصلى اتخنقت من ريحة برفان الأستاذ
بتقولى حاجة يا آنسة: جاتك القرف فى حلاوتك