تخاريف

ما تيجى نخرف شوية و نحكى سوا كل يوم بنصحى من النوم نعمل ايه ؟؟
انا مثلا كل يوم باصحى من النوم اتوضى و اصلى الضحى و افتح الدولاب ... ادور على اى هدوم البسها و خلاص علشان اروح الشغل
ملحوظة هامة: لو عندى اكتئاب او متضايقة من حاجة بدور كويس وسط هدومى على اشيك حاجة ممكن البسها و تريحنى نفسيا و بلبس و بتأنتك جدااااااااا ليه معرفش ؟؟ بس بحب ابقى متألقة و على سنجة عشرة زى ما بيقولو
المهم بلبس و بنزل ... و مع كل خطوة بنزلها على السلم بفكر .. يا ترى البواب مسح العربية و لا زى كل يوم هيدوخنى معاه
طيب لو ممسحهاش اعمل ايه ؟؟؟ .... لحد لما انزل و اسخن و اركب ... اشغل اذكار الصباح و ابتدى يومى .
مع اول ملف اقعد افكر يا ترى الدنيا هتبقى زحمة ؟؟؟ يا ترى هلاقى راكنة لما اوصل ؟؟؟
و انا بفكر بتفرج على الدنيا من حواليا .. ليه بردوه مش عارفة ما تخلينى فى طريقى و خلاص بلا وجع دماغ
بس لا ادينى بتفرج ...
ياااااااااه واحد راجل معاه بيبى صغير مغطيه بكل البطاطين الى عنده علشان ميبردش ...... يا ترى رايح بيه فين على الصبح كده ؟؟؟
اكيد مراته راحت الشغل بدرى عنه و هو هيودى البيبى ده الحضانة ... بس يا حرام ده صغنون اوى فى البرد ده
قطة صغنونة واقفة بتشرب من نقطة ماية على الارض يا سلام ربنا كريم اكيد زى ما رزقها بشوية الماية دول هيرزقها كمان بأكل و اكيد هتشبع و تحمد ربنا
ولاد صغيرين رايحين المدرسة الى معاه باباه و الى معاه ماممته و الى ماشى لوحده بس كتير اوى !!! كل دول هيكبرو ... و ياترى هيعرفو يكملو تعليمهم ... و يا ترى هيلاقو شغل ؟؟؟
يوه توك توك فى كل مكان بيطلعلى من تحت الارض تحس انهم نمل بيجرى كده فى حركات دائرية بدون اتجاه محدد .. عكس الشارع بقى او حتى على الرصيف ... ربنا يستر
بلدنا كلها اشارات و الى يغيظ بقى ان الاشارة بتبقى ماشية كل يوم الا اليوم الى بيبقى واقف فيه ظابط .. تقولش جاى يوقف الطريق غلاسة يعنى .. يوم لما بيبقى ظابط واقف مش عسكرى بيبقى يوم رخم جدا .. بصراحة مش بطيقهم ( الظباط يعنى )
و انا واقفة فى الاشارة بياع فل راجل كبير رفيع جداااا معاه فل .. مبتسم يجبرك بابتسامته انك تشترى منه ... راجل غريب يا ترى ده طلع معاش و بيبيع فل علشان يصرف على ولاده مثلا .. مش عارفة ليه مرة حسيت ان الراجل ده صاحب سيجارة و كوباية .. متسألونيش ليه ... بس مرة كان واقف فى الاشارة و حاطت السيجارة فى بوقه بطريقة غريبة كده زى الافلام العربى القديمة ... امشى يا مروة امشى ان بعد الظن اثم و بعدين انت مالك اصلا !!!!!!!
ايه ده؟؟ بس بياع الفل مش الوحيد الى فى الاشارة فيه كمان بياع مناديل ولد صغير لا يتعدى ال 17 سنة و فيه كمان ست منقبة بتبع مناديل .. تفتكر قرايب ... طيب بلاش قرايب ... تفتكر الست المنقبة دى .. منقبة صحيح و لا لابسة نقاب علشان تدارى وشها و محدش يعرفها ؟؟؟؟؟؟؟؟ يوووووه انا عارفة بقى انا مالى .....
راكبة انا بقى عربيتى و الدنيا برد جداااااااااا ... ببص جنبى لاقيت ايه موزة موزة يعنى راكبة مرسيدس جيب معرفش ماركتها ايه و الله غير انها مرسيدس و عالية كده انما ايه روعة و لا البنت الى ركباها ريحتها حلوةةةةةةةةة .. هتقولولى انت شمتيها ؟؟؟ هرد و اقولكم لا بس باين عليها ... عادى يعنى .. اصلها شعرها بيهفهف كده و امورة جدا تحس ملفوفة بورق سوليفان ... نوع زى ده اكيد ريحته حلوة ... ما علينا نبقى نتكلم فى الموضوع ده بعدين ...
و بعدين يعنى فيها ايه هى راكبة عربية و انا راكبة عربية مش ليها 4 عجلات بردوه عادى يعنى ... بس و النبى مش عايزين تريقة اهو الحمدلله على كل شئ .. و حمارتك العارجة تغنيك عن سؤال اللائيم ... مرسيدس بقى و لااااااااا ... اهو ربنا يباركلى فيها .. ادعولها بس متبوظش
اه نسيت اقولكم ....... على الراجل الى كان راكب ميكروباص جنبى .. ضحكنى ضحك على الصبح .. الراجل ترى شيك الصراحة .. لابس بدلة بنى و تحتها بلوفر اخضر و معاه كرافت اورانج فى بيج و كوفيه نبيتى الصراحة مش عارفة هو لابس كل الهدوم الى عنده على بعضها ليه يا ترى بردان يعنى و لا دى اناقة و لا ايه ..
اسكتو بقى و دع الخلق للخالق ...
المشهد بقى اللى خلانى افكر اكتب كل ده ايه ؟؟؟ ايوة هو ايه ؟؟؟ هقولكم اهو متزقوش
عربية كارو عليها 2 عربجية واحد سايق الحصان و التانى جنبه محملة جزر لونين احمر و برتقالى بس ايه الوانها روعة كأنه لسة مقطوف حالا و مليانة على اخرها لحد فوق ... الملفت للانتباه بقى ان الراجل الى قاعد جنب الى سايق لابس على راسه كاب من الطويل ده الى الوانه علم مصر و الى جنبه حاطتت علم مصر على كتفه ... لا و ايه فوق الجزر ده كله فوق خااااااااالص علم مصر كبير بهفهف كده ... و الله اتبسطت جدا .. قلت يجو الى بتكلمو على مصر و المصرين يتفرجو ... ابسط البسطاء بيحبوها قد ايه ؟؟؟
معلش قلبت نشرة الساعة 9 مساء... بس بردوه ما علينا نبقى نتكلم فى الموضوع ده بعدين
الحمدلله وصلت تحت الشغل ... ركنت ... السايس استظرف زى كل يوم ....
السايس ده بقى حكايته حكاية ابقوا فكرونى احكيهالكم بس مرة تانية ..
المهم خلينا فى موضوعنا ... يلا نخرف سوا بقى و اللى عنده حاجة ممكن يقولها لنا على نظامه لما بيصحى الصبح يقولها .. انا متأكده ان كلكم بتعملو زى و بتتفرجو على الدنيا .. يلا اكتبو مستنين ايه ؟؟؟؟؟؟؟؟؟؟؟

م.م.أ.ط


التعليق:
نص جميل جداً. لغته ممتعة (رغم انها عامية) يملك مع خفة الدم والتلقائية عمقاً حقيقياً في رؤية الحياة، ليس فقط في التفصيلات بل في الجوهر أيضا. لا استطيع ان اعتبره قصة قصيرة، ولا أظن أن كاتبه أو كاتبته قصد ذلك، لأن خيطاً يربط كل ما حدث مفتقد، لكنها كتابة تستحق ان تكتب وأن تحترم ربما تخلق نوعاً ادبياً جديداً.
د. سيد البحراوي
أستاذ الأدب العربي الحديث بكلية الآداب، جامعة القاهرة