عانس بكرامتي

تحرريريريريريريريريريرير
أبوالعلا يا اسطى** الأجرة جنيه ونص** ماشي يا اسطى..
قعدت في الكرسي اللي ورا السواق جنب الشباك وهي بتدعي أن متقعدش جنبها واحدة ست بعيل مبربر
وفعلا جت واحدة ست بابنها هي في حرج حطت الشنطة جنبها
المكان ده محجوز يا مدام
طيب ياختي (مع شتايم وبرطمة في سرها)
العربية اتملت تقريبا مش فاضل غير المكان اللي جنبها
السواق: حاجزة لمين يا أبلة عايزين نمشي
وفجأة ظهر قميص أبيض وبنطلون بلو بلاك الدرجة اللي هي بتحبها متغرقين برفان بس مش لولوا جواهم شاب موز جدا
الشاب: ممكن أقعد هنا** ياخرابي إلا ممكن يعني شيك وكمان محترم لا مش ممكن
افندم** لا أبدًا اتفضل
بينها وبين نفسها: الله شاب أمور ومحترم كمان لا مش معقول
الشاب طلع الأجرة شافت إيده مافيش دبلة
وكمان مش مرتبط يا بركة دعاكي يا ماما
إممم أنا لازم اتصرف والفت نظره هو أكيد أخد باله مني وإلا مكانش جه يقعد جنبي مانا عارفة الحركات دي إممم ياترى هيبتدي كلام إزاي
احححححححححححححح الحمد لله الطريق واقف خد فرصتك متتكسفش بينها وبين نفسها
هو شوية كده هيحاول يكلمني
إوعي تدلقي
لا مش هرد طبعا من أول مرة لحسن يفتكرني واقعة
بس ركزي لا يطفش
بس لو كررها هرد أحسن ينزل ويختفي وده موز قوي
أيوة أعملي الصح خليكي تتخطبي بقي زي شيماء
آه واجيب فستان من أتيليه ديدي
يارب ميطلعش قيحة ويدفع إيجار الفستان
ممكن يجيب شبكة عرة
وماله مش مشكلة خلينا نخلص
آه ونخش بقي في الجهاز
يالهوي دي ماما مش محوشالي حاجات كتير
بس أمه أكيد هتعيب على أطقم السرير عشان أمك مجابتش غير 30 طقم بس
الله يسامحك ياما
ولا أخته الرخمة هتقعد تحشر نفسها في لبسك بقى
لا طبعا هديها على نافوخها
وهو بعد الجواز هيبقي رخم ويبطل يلبس شيك
آه ويطلعله كرش ويصلع
ومش هيسيبك تلبسي شيك
شيك أيه بقى مانا هتخن وأفشول من الحمل
آه وتبقي وحشة ويقعد يتريق عليكي
نفسيتي تتدمر وآكل كتير
والعيال يجننوكي وهو برة روق
تتعبي وتصدعي وعينيكي تبقي في وسط راسك اللي بيسهل واللي عيان واللي فاشل ولا البت مش سايبة الموبايل
وهو برة ولا في دمغه
البت تعنس وتقعد في قرابيزك والواد يشم كلة
وهو يطلقك ويروح يتجوز شيماء اللي جوزها مات
وارجع لوحدي تاني
لا معاكي عيال مقرفين تشيلي همهم
على جنب ياسطي لو سمحت
إحنا لسة في المظلات يا أبلة
آه معلش أصلي اتخنقت من ريحة برفان الأستاذ
بتقولي حاجة يا أنسة: جاتك القرف في حلاوتك
عانس بكرامتي