عم بخ إيه الجديد؟

فى عام ما وبعد يوم طويل من الأحداث والتوتر ملقتش غير كريم صديقى، لبست ونزلت واتمشيت لحد ما وصلتله «عم بخ يطرق على الباب... يفتح له صديقه كريم وصوت أغنية أم كلثوم الأطلال من داخل شقة كريم»، ويبدأ الحوار
بخ: إيه رأيك فى اللى حصل النهاردة؟
كريم: إيه الجديد؟
بخ: يا كريم ده كان فى ناس كانت بتموت وناس فى نفس الوقت كانت بترقص وبتحتفل عادى؟
كريم مبتسمًا: مستغرب ليه؟ إنت ناسى لما نزلنا قولنا هنكمل، قالوا بانديتا وبلطجية.. وبعدها قالوا شمامين كلة ونزلنا وكملنا وفى ناس نزلت إحتفلت عند الجامعة لمجرد إن السلطة كانت فى إيديهم..و النهاردة الناس نزلت بتحتفل وناس نزلت تكمل وناس نزلت عشان الشعرية وناس قعدت ع الكنبة.. عادى.. شىء ما عفن فى الدنمارك.
بخ: مش وقت هاملت خالص.
كريم: (يسأل) إنت كنت فين النهاردة صحيح ؟
بخ: (فى ابتسامة) كنت ع الكنبة
كريم: هى السياسة كده... يوم فى الشارع ويوم فى المستشفى ويوم فى السجن ويوم بترقص ويوم فى المشرحة ويوم ع الكنبة!!
بخ: أنا مش فاهم حاجة فهمنى يا كريم بعد إذنك.
كريم: بص يا سيدى مش لازم كل ذكرى نحييها، لازم نهدى شوية عشان الجيل اللى قبلنا شايفنا دلوقتى جيل فاشل وإحنا اللى كنا هنوديهم فى داهية، وإحنا اللى كنا بنخرب.. فهمت؟
بخ: بس إحنا لو فاشلين فده نتيجة سكوتهم وخوفهم من نظام قديم فاشل معملش لهم ولا لينا أى حاجة.. على الأقل إحنا بنحاول وبنجرب وبنتعلم وبنطلب حقنا والخبرة بتيجى واحدة واحدة.. صح ؟
كريم مبتسما: أنا معاك بس متنساش موضوع الأمان والتفجيرات والمخططات والتقسيم وده صح، جرب كده إتناقش مع أهلك فى البيت هتلاقيهم بيقولوا نفس الكلام اللى بيتقال فى الإعلام، ومتنساش كمان شوية العيال اللى دخلوا علينا مبيعملوش أى حاجة غير إنهم يشتبكوا مع الداخلية ويشتموا ويخونوا فى بعض.. ده غير التانيين اللى فاهمين الحرية غلط.. كل ده بيخسرنا مش بيكسبنا.. فهمت ؟
بخ: يعنى إيه.؟ الشىء العفن ساب الدنمارك وهنفضل ساكتين ونقعد فى بيوتنا .. العيش والحرية مش مجرد شعار بالنسبة لنا. ده حلم مات عشانه أنضف ما فينا كلنا.
كريم: عارف وفاهم قصدك وأكيد فى حل.. بس على المدى الطويل.. خلاص التظاهر والاعتصامات والإضرابات بقيت كروت محروقة، لازم إحنا بقى نتعامل بذكاء، نخلع من الصراع ده طالما إحنا مش عاوزين كراسى فعلًا ولازم نقرب من الشعب.. نشوف مشاكلهم إيه اللى هى هى نفس مشاكلنا بس نسمع منهم ونحاول نحلها..
ممكن كل واحد فى منطقته يعمل مجموعة ويشتغل فيها هتبتدى الثقة المفقودة ترجع تانى.. واحدة واحدة.. منطقة منطقة.. ولو اشتغلنا صح.. البلد هتتظبط
لازم نعكس الهرم.. الشعب يحكم والسلطة تنفذ.. لو قدرنا نعمل ده يبقى ساعتها حلمنا نجح.
بخ: بس فى حاجات كتير مش هنعرف نعملها بحكم الفلوس والإمكانيات
كريم: إيه يا عم اليأس ده من أوله..خلى بس الناس تثق فيك الأول هتلاقيهم رافعين قايمة الطلبات ..فهمت؟
بخ مبتسمًا: فهمت وارتحت شوية ... بس سؤال: نخلينا ع الكنبة شوية ولا نبتدى ننزل نتحرك ؟
كريم: ممكن تخليك.. بس اشتغل الفترة دى وجرب الكلام ده عملى وابدأ فيه مع أهلك
بخ مبتسما ويقوم يقف: حاضر هبدأ.. أستأذن أنا بقى..سلام يا صديقى.
كريم: سلام يا رفيق