قدم الإعلامي المصري أكرم حسني، متقمصا شخصية «سيد أبو حفيظة»، نصائح للشباب والبنات المقبلين على الزواج، وذلك في برنامجه «أسعد الله مساءكم من جديد» على قناة «MBC مصر»، وكانت أول نصائحه: «متجوزوش». أبو حفيظة وجه عدة نصائح للشباب في البداية، قائلا: 1- متجوزش واحدة حاطة على بروفايلها صورة تويتي أو شاروخان أو أي حد من فريق واما. 2- خليك على طبيعتك من أول يوم، لو بتاكل بإيديك كل بإيديك، لو مبتحطش مزيل عرق ابدأ اتعود تحط مزيل عرق ده لنفسك بلاش عفانة. 3- لو أبوها قال كان متقدم لها إيهاب توفيق وكان هيجيبلها إيه، ألبس جزمتك وخد أبوك وانزلوا. 4-خبي صورك وأنت صغير، لأن أمك هتستغلها أسوأ استغلال في أول زيارة لأهل العروسة. 5- أوضة الأطفال، غسالة الأطباق، التكييف، البلاي ستيشن، المشاية الرياضية، دي حاجات ممكن نجيبها على مهلنا، مش لازم لا نلغي الجواز ولا نأجله علشانها. 6- النيش والترابيزة والصالون والبونبونيرة والتماثيل والأصنام، دي حاجات متجيبهاش أصلا. 7- أنت مش مضطر تدي عيدية، وتجيب ياميش في رمضان، وكحك في العيد الصغير، ولحمة في العيد الكبير، وحلاوة المولد، والفلانتين المصري والأجنبي، الفلوس دي حوشها علشان تجوزوا. 8- حاول متعملش فرح، أقل فرح هيتكلف من 15 ل 20 ألف جنيه، علشان ساعتين رقص ونميمة لناس متعرفهومش، ولو مقدرتش تقنعها بليز بلاش تشربوا بعض من الشاليموهات، ده قرف جدا. 9- لو لاقيتها لابسة قميص نوم بريش أو في وشها جليتر طلقها. 10- معلش تعالى على نفسك ومتشربش من بق الإزازة واملاها بعد ما تشرب. ثم وجه نصائحه للبنات بقوله: 1- الخشاف والجلي والشربة ممكن يتعملوا في حاجة واحدة طالما انتي غسلتيها كويس. 2- ملكيش دعوة بباكينام وشيماء اللي عملوا فرحهم فين وسافروا فين. 3-أدي لجوزك حيز من الفراغ، سيبيه يعك على خفيف 4- قبل الفرح بشهر تحاشيه تماما بيبقى طلعان عينه ما بين شغله والعمال والفرح والمعازيم، فبلاش تساليه في أغاني الدي جي اللي انتي اخترتيها. 5-هناكل إيه بكرة؟ دى سبب طلاق 60% من ستات مصر، أبوس إيديكي بلاش الجملة دي، اعملي أي حاجة. 6-الخلفة ده قرار ثنائي تاخديه انتي وجوزك بس، واتفقوا انتوا الاتنين على الاسم، بعيدا عن اسماء زي خيرت وعظمة.
