مجتمع "ذكوري".. "فضيحة"

الغريب في مجتمعنا إن لما الولد يعمل موقف بيبقى تمجيد ورجولة منه، أما لو البنت عملت نفس الموقف بيكون عار عليها.
ليه لما الولد يشرب سجاير يبقى رجولة منه، ولما البنت تشرب نفس السجاير تبقى صايعة ومش محترمة.
ليه لما الولد يكون شغله متأخر ويرجع بليل من الشغل يبقى عادى وبيشقى وبيتعب، أما لو البنت تبقى مش محترمة إنها تتأخر لساعة زي ديه.
ليه الولد يقدر يخرج في أي وقت ويرجع في أي وقت، ليه البنت مينفعش، ليه دايما بتكون مجبرة تخرج بميعاد وترجع بميعاد.
ليه إحساس إن لازم يكون فيه راجل فى البيت مهم أهم من وجود الست نفسها.
ليه الولد يقدر يسافر في أي مكان و البنت لو سافرت تبقى مش لاقية حد يلمها.
ليه لازم الست لما تتجوز تخلف ولد ولو مخلفتهوش تبقى مجبتش عيال.
ليه البنت لو متجوزتش تبقى عانس والراجل لو متجوزش يبقى بيستمتع بحياته وبيقضي شبابه.
ليه دايما مينفعش البنت تنزل بأي لبس هي حباه ولازم يكون طويل.
ليه لازم تسمع كلام غريب وإيحاءات مش من المفترض تسمعها وكأنها منتظرة كلمة قمر اللي هيقولها لها أو كلمة "انتي مزة جامدة جدي"، ولا إن واحد يبحلق فى كل تفصيله فى جسمها وكأنها مش لابسه حاجة وبعد كل ده يمد إيده عليها ويتحرش بيها، ومن المفترض تسكت وتكتم جواها، عشان حاجة اسمها "فضيحة".