هاني شنودة: ويجز رئيس المرحلة وتقلان عليا لكن من حقه وهذا سبب رفض العزف مع أم كلثوم

أكد الموسيقار هاني شنودة، على استمراره في متابعة أصوات المطربين الجدد، مثلما كان يفعل في الماضي، مشيرا أنه يستمع لمطرب الراب ويجز، ومطرب المهرجانات حسن شاكوش، وكل المطربين الشباب، «بسمع كل حاجة عشان اعرف احنا رايحين فين».
وأضاف شنودة في برنامج «الستات»، والمذاع عبر فضائية «النهار»، قائلا: «كنت عايز اللحن لويجز قبل كدة، ولسة التحدي قائم، لأن ويجز هو رئيس هذه المرحلة، واذا دخلت للريس الباقي هيعمل زيك، وانا كنت رافض مرحلة المهرجانات بسبب كلماتها، طول ما هما بيرقصوا الناس معنديش مشكلة، لكن الكلمات كان فيها ترويج للمخدرات».
وأشار: «كان عندي موقف من كلمات المهرجانات مش المهرجانات نفسها، والمرحلة دي بتاعت الراب، وكلماتها مناسبة، وويجز تقلان عليا ولم نتواصل لتحضير اي عمل حتى الان، ومن حقه يتقل، لان الشباب معتقدين ان الجيل الاقدم عقولهم مغلقة».
سر خطير عن نجاة الصغيرة
كشفت الاعلامية سهير جودة، عن كواليس اختيار نجاة للأغاني من الموسيقار هاني شنودة، قائلة: «كانت بتسمع الاغاني تحت بيتك والاغنية اللي تعجبها تطلع تخبط عليك وتاخدها».
وقال هانى شنودة: «كنت ساكن في الدقي في الدور الارضي، كانت بتيجي متخفية، ربنا يديها الصحة، وهي فضلها كبير على الفن المصري».
وتابع شنودة: «كنت بلاقيها تخبط عليا وتقولي ايه اللي كنت بتلعبه دلوقتي، انا هبعتلك الابنودي يكتب عليها كلام وتبقى بتاعتي، واكتشفت انها بتقعد تحت بيتي بعدين، لان مش ممكن تكون بتيجي كل مرة على اغنية بالظبط».
واشار: «كانت بتخلي السواق يركن العربية جنب البيت وتنزل تتمشى، هي كانت صيادة، بتعرف تصطاد الاغاني، هي غنت من الحاني 3 اغاني ونجحوا، اغنية بحلم معاك، انا بعشق البحر، ويوم الهنا».
سبب رفضه العزف مع ام كلثوم
كشف الموسيقار هاني شنودة، عن سبب رفضه العزف وراء كوكب الشرق أم كلثوم، خلال غنائها، بسبب أن مدة العزف تكون قليلة قبل بداية الأغنية، الأمر الذي جعله يرفض بشدة.
وأضاف شنودة، في برنامج «الستات»، والمذاع عبر فضائية «النهار»، قائلا: «انا رفضت لاني مكنتش حابب اعزف 30 دقائق، وام كلثوم تفضل تغني لحد ما تخلص الاغنية، يعني اسكت ساعة الا ربع، وكان السبب اني ارفض العكل معها».
وأوضح شنودة: ان رفضه العزف وراء ام كلثوم كان خطأ وميزة في نفس الوقت، انه اهتم بنفسه كمؤلف موسيقي، ورفضه كان خطأ لأن كوكب الشرق اسم كبير، في عالم و الموسيقى».
هاني شنودة عن «أحمد النقاش»: «صوته حلو اوي»
حرص الموسيقار هاني شنودة، على دعم للمطرب النقاش في بداية مشواره الغنائي، مثلما فعل مع عدد كبير من المطربين في الماضي، أبرزهم محمد منير وعمرو دياب.
وأضاف هاني شنودة في برنامج «الستات»، والمذاع عبر فضائية «النهار»، قائلا: «احمد ده مطرب كويس اوي، وانا اتعودت من زمان اساعد الناس، محدش بيقدر يغير نفسه، وببقى سعيد جدا وانا بساعد الشباب».
وأشار هاني شنودة: «رسالتي من دعم الشباب ان مصر فيها مواهب لكنهم فقراء الحظ، ولو كل واحد اهتم بنفسه ورفض مساعدة غيره مش هتبقى بلد، وهي بلد عشان كلنا متجمعين احنا بلد كويسة ومصر من البلاد الكويسة جدا».