مى عمر: أنا بطلة من غير واسطة وتاريخى هو اللى هيحكم

أكدت الفنانة مي عمر إنها تطمع في تحقيق نجاح أو ذات أو صحة أو أسرة سعيدة، لكنها لا تطمع في الماديات.
وأضافت مي عمر خلال حوارها مع بسمة وهبة في برنامج "العرافة" المُذاع على قناة "المحور": "بالنسبة للساعات والمجوهرات فهي مش بتفرق لي، عندي ساعة جديدة مقفول عليها بقالها 5 شهور، محمد بيتخانق معايا لأنه جايبهالي هدية ومش بلبسها".
وتابعت : "أنا بتعلق بحاجتي ولما بجيب عربية جديدة، ولما بغير حاجتي بزعل عليها".
وأوضحت مي عمر أنها ترى أن السعادة هي الرضا والعائلة والنجاح، مشددة على أنها لن تقدم على المشاركة في أي دور جرى ترشيح ممثلة أخرى لتجسيده إذا كان من تأليف زوجها من خلال استغلال علاقة الزواج التي تربطهما "عمري ما قلت لمحمد الدور ده عاجبني عاوزة أعمله".
وعن اتهامها بأنها نجحت في عالم الفن عن طريق الواسطة، لأن زوجها هو المخرج محمد سامي، قالت إنها بعدما شاركت في مسلسلها الأول "الأسطورة" مع زوجها، قدمت مسلسل "عفاريت عدلي علام"، وأوضحت: "ده مكنش بواسطة، وكنت عاملة مشاهد حب معاه أبيض وأسود، وفي نفس السنة قدمت ريح المدام".
وأضافت : "الرد لازم يبقى بالأعمال، والاتهامات بالواسطة بتاخد وقتها، ولما الناس تشوف تاريخ بعد 10 سنين هيبصوا على الأدوار، وفي الآخر مش بيهمني اشتغلت بواسطة ولا لأ، أو مع جوزي أو مش معاه، بس المهم جودة الدور".
وتابعت أنها قدمت فيلم "آخر ديك في مصر" مع النجم محمد رمضان: "بعمل حاجات كتير جدا بره، ولما أرجع اشتغل مع محمد يقولوا واسطة، وفي الآخر الناس اللي في الشارع مش بيقولوا الكلام ده ولا بيشوفوا ده".
ويعد برنامج "العرافة" امتدادا لبرامج بسمة وهبة الرمضانية التي تعتمد على كشف أدق تفاصيل النجوم وخباياهم وإظهار الوجه الآخر لهم، ما يؤدي لصدمة كبيرة لدى الضيوف والمشاهدين.