حسام داغر ل محمود الجندي: يارب متكونش مشيت وأنت زعلان

نعى الفنان حسام داغر، بكلمات مؤثرة الفنان القدير الراحل محمود الجندي، وذلك عبر حسابها الشخصي بموقع التواصل الاجتماعي "فيس بوك".
وكتب داغر قائلاً: "حبيبي و أبي الروحي و صديقي الأستاذ محمود الجندي ترك عالمنا بعد إن ضاق عليه وعلي روحه الكبيرة السمحة غزيرة الموهبة .. تعلمت منك الكثير وتجاربي معك و أكبرها تأثيراً عليا علي الإطلاق الابن خالد وعلاقته بابيه رشدي ، لسه فاكر أول بروفة للمسلسل و نصائحك ليا الخارجة من خبرة السنين و ضحكه شخصيه رشدي اللي طلعتها و أنت بتقرأ وبتقول هي دي ضحكه رشدي المستفزة
وتابع قائلاً: "وأنا بشوفك قدامي مكنتش شايف محمود الجندي الممثل كنت شايف كل شخصياتك بتمر قدامي الي إتربيت عليها مراد في علشان خاطر عيونك و شوقي رضوان و محسن و ضاحي النمر وعلي الزهار وسلامه الطفشان وغيرهم كتير كنت بتعلم منك و بشوفك شغال منين وازاي متعلمش منك وانت معلم الكل الاستاذ المخرج خريج معهد السينما وازاي علمتني التعامل مع العدسات و طبيعه التمثيل الخاص بها".
وأضاف: "يالي اتعلمت منك إن اصغر عضله في العين بتمثل واوعي تستهون بأهميه التصوير واحجام الكادرات فكل تفصيلة ليك كممثل الكاميرا بتشوفها، و لقائتنا سواء في البرامج أو الندوات بعد ابن حلال بسبب القضية اللي اثرناها بقتل الابن لابوه و دفاعك الواعي عن وجهه نظر المخرج و المؤلف و اتصالك بيا مره في برنامج علي الهوا و انت بتقولي متخليش حد يوقع بينا يا حسام".
واختتم داغر قائلاً: ".يااااه موجوع وجع شديد خصوصاً بعد آخر مكالمة بطمئن عليك فيها وكان صوتك متغير جدا مفيهوش الضحكه اللي عودتنا عليها في التصوير ولا غناؤك الجميل ولا نكتك اللي مبتخلصش وقلتلي أنا زعلان من حاجات كتير في الوسط، زعل الطيبين عقابه كبير قوي عند ربنا، يارب متكونش مشيت وانت زعلان".