البرادعي والسلفية .... وجوجل

تمشى في شوارع مصر تسمع الناس على القهاوي وفى الموصلات والتجمعات المختلفة كلامهم اتغير من الكورة والفن إلى السياسة بمختلف المستويات الثقافية والمادية والدينية... الإخوان والسلفيين والبردعي والمجلس العسكري إلى النهاية حتى الأطفال تتكلم فى السياسة بعد سماع الأهل فى البيوت.
قبل سنة الناس كانت بتتكلم عن ظلم الشرطة وغلاء الأسعار وكان فى شباب بتتكلم عن أنه بيشتغل مع فلان الفلاني ويقعد يوصف صاحب عمله وممتلكاته من العربية اللي فيها كمبيوتر وبتمشى لوحدها أو على القصر اللي ساكن فيه وممكن يكون على شياكة وزوق صاحب العمل أو على مراته اللي بتلبس عريان وخلافه
لكن دلوقتى
البردعى عميل أمريكانى... بتسمع الجملة دي من ناس كتير وممكن تكون متعلمة وكمان عندها كل وسائل الاتصال الحديثة من انترنت وخلافه, وناس تانية بتقول إن الاخوان والسلفيين هيخربوا البلد وناس بتقول العلمانية والليبرالية الكافرة وكلام كتير من النوع ده
تستغرب إن ربنا اداله عقل يفكر بيه وعلم وكمبيوتر وانترنت ومكلفش نفسه انه يعمل بحث عن حقيقة البرادعى أو الفكر السلفى او العلمانى
لو سألت يعنى أيه علمانى هيكون جوابه أن العلمانية يعنى الكفر ولو سألته أيه الفرق بين العلمانية والليبرالية هيقولك مفيش فرق, وبتوصل الأمور لأكثر من كده أن واحد يقولك أنا انتخب رئيس جمهورية بدقن وجلبيه قصيرة!! وواحد تانى يقولك انا انتخب رئيس جمهورية اصلع واسمه البرادعى
للأسف إن اللي فات مش كلام الناس الجهلة ولا كلام الناس المتعلمة تعليم عالى ده كلام دكاترة أو المفروض دكاترة ورجال دين وكتاب ومفكرين
فى دكتور شيخ سلفى بيقول ان الليبرالية على لسانه "يعنى امك متلبسش حجاب" والمصيبة إن كان الحوار قدام عدد غفير من الناس وبعد كده خاض فى الاعراض وكان التركيز على البرادعى وبنته وعلى لسانه "يابرادعى يالى بنتك متجوزة ليبرالى كافر" ويقصد أنه ديانة زوج بنته مش مسلم وبعد كده الدكتور ادرك الخطأ و اعتذر في البرنامج بتاعه لانه لم يتحرى الدقة فى المعلومات ونسى او تناسى تمام قول الله تعالى : {يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ }الحجرات6 وايضا: {يَا أَيُّهَا الَّذِينَ آمَنُوا اجْتَنِبُوا كَثِيراً مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَب بَّعْضُكُم بَعْضاً أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتاً فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ }الحجرات12
مش عيب عليك تبقى دكتور وتعمل كده سبت ايه لانصاف المتعلمين والجهلة وكنت عايز اعرف بعد الخوض فى الأعراض مش فى عقاب لكده فى الإسلام وتقريبا 80 جلدة وانت راجل سلفى بتنادى بتحقيق شرع الله فى الأرض وكل اللي اقدر أقوله إن كان كل تركيزه على "الحااااااااق شوفو واحد ليبرالى اهو بيعمل حاجة غلط والليبراليين كفرة..."
ونخرج من السلفين وندخل على الليبراليين وكانت الفاجعة كاتب وسيناريست معروف ومقدم برنامج تلفزيونى شاهد فيديو على الفيس بوك او اليوتيوب للشيخ ابواسحاق الحوينى وهوا يقول على المراة جاهلة وطبعا الشيخ خد النقد التمام وكمان السلفيين على أساس إن الشيخ سلفى وبعد ما بحثت على الفيديو المقصود لقيت الفيديو متقطع ومحذوف منه حاجات كتير وكمان مكتوب شتيمة وكلام يدل على كره صانع الفيديو للإسلام والسلفية ومكتوب أيضًا اسم القناة على اليوتيوب الصنعة الفيديو وبعد الدخول على القناة اكتشف انه قناة اسمها "فرسان الشيعة" لا تعليق!!.
فضلت تقريبا ساعة أبحث على الفيديو الأصلى للحلقة وفى الآخر لقيته وبعد ما شفت الفيديو الأصلى اكتشفت إن الفيديو المزور أخفى حقيقة حديث الشيخ وأظهر صورة الشيخ بأنه متخلف ورجعى وطبعا التخلف والرجعية سمة من سمات السلفيين والدليل اهو .... قالولوا (مع الاعتزار للشاهد الماشفش حاجة)
الأفظع من كده إن ناس كتير إعلامية وتعمل فى مهنة الصحافة كانت بتنشر الفيديو على حسابات الفيس بوك الخاصة بها وتعلق عليها وتنسى تماما أن توجد معايير لنشر الخبر ومنها التأكد من مصدر الخبر وكان كل تركيزهم على "الحق شوف واحد سلفى اهو بيعمل حاجة غلط والسلفين متخلفين..."
أنا شايف إن مفيش فرق بين دكتور سلفى وكاتب ليبرالى فى تغييب عقول الناس وبعدهم عن الحقيقة الحياة ده كان غرضه تشويه صورة الليبرالية والثانى تشويه صورة السلفية
علشان تكون إنسان جديد بعد الثورة فاكر ودور على الحق وحكم عقلك قبل ما تخطو خطوة وانصح جيرانك و أصحابك وزميلك كل ما تسمع حاجة عن حد اعمل عليها بحث فى جوجل هتعرف الحقيقة.
اعمل بحث عن الليبراليه والعلمانية والسلفية و الاخوان واى معلومة تسمعها على شان متبقاش حمار
اعمل بحث عن البرادعى والشيخ ابو اسحاق وعمرو موسى علشان تعرف مين الناس دي ومحدش يقول عليك حمار
اعمل بحث عن المرشحين لمجلس الشعب عن الدايرة بتاعتك علشان متديش صوتك لأى حد تحت اسم الدين أو التقدم أو الرفاهية أوتحت أى اسم وتبقى حمار
دور فى اكتر من موقع وماتخدش المعلومة من مصدر واحد
دور فى المواقع المعروفة زى المواقع الكبيرة أو الموسوعة الحرة "ويكيبديا"
ارجوك ارجوك احنا فى فترة مينفعش تكون فيها حمار