لميس الحديدي بعد خروج مصر من كأس العرب: "ليه نتهزأ ونبقى حصالة المجموعة"

علقت الإعلامية لميس الحديدي، على خسارة منتخب مصر أمام نظيره الأردني بثلاثة أهداف دون مقابل، في المباراة التي جمعت المنتخبين لحساب الجولة الثالثة بدور المجموعات من بطولة كأس العرب 2025 التي تنظمها قطر حتى الثامن عشر من ديسمبر الجاري.
انتقادات وتساؤلات
وقالت "لميس الحديدي" ببرنامج "الصورة" المذاع على فضائية "النهار"، مساء الثلاثاء، "خبر نكد علينا كلنا، خروج المنتخب بقيادة حلمي طولان بعد تعادلين مع الكويت والإمارات ثم هزيمة ثلاثية ثقيلة أمام منتخب الأردن الثالث."
ووجهت انتقادات لكابتن حلمي طولان المدير الفني لمنتخب مصر المشارك في بطولة كأس العرب، "عندي سؤال، الخروج النهاردة يستحق وقفة، هو إحنا أصلًا رحنا ليه؟ ومحدش يقولي معلش أصل المنتخب الثاني أو الأول بشرطة، ما دام مش قد مسؤولية إنك تلعب باسم مصر يبقى ماتروحش."
جمل ومبررات
وواصلت: "ما دام بتلعب باسم مصر، يا تروح تمثل مصر وتحمل اسمها وكأنك المنتخب الأول، يا إما ماتروحش خالص، حتى الجملة اللي بنستخدمها عشان نبرر خروج مصر من البطولات بتاعت التمثيل المشرف اللي بنقولها مكنتش موجودة في كأس العرب."
أكملت: عارفين يعني إيه؟ هُزمنا من المنتخب الأردني الثالث، وليس الأول ولا الثاني، مافيش أسوأ من كده، كان معاك أفشة ومروان حمدي وأكرم توفيق والنني، عندك محترفين، ومع ذلك إحنا ما انجحناش وما لعبناش ومكنّاش موجودين أصلًا."
تصريحات عجيبة
وأردفت: "كابتن حلمي طولان المدير الفني للمنتخب كانت تصريحاته عجيبة شوية بعد المباراة، قال إنه يتحمل المسؤولية وشكرًا، بس بعدها فتح مصنع الشماعات والحجج، أصل الفريق ولد يتيمًا، وقالولنا إنها مباريات ودية مش رسمية. ليه حضرتك متعرفش البطولة؟ ما تسأل حد أو كلّم شات جي بي تي."
وعن تصريحه الذي قال فيه: خروجنا من البطولة جاء بفعل فاعل، والجميع يعرف من المسؤول، لم يتم إيقاف الدوري المصري بسبب نادي بيراميدز. علقت لميس الحديدي "قصدك مين؟ أحمد دياب رئيس الرابطة؟ لأنه شكر هاني أبو ريدة رئيس الاتحاد".
رسالة لحلمي طولان
وتابعت "يعني من غير لاعبي بيراميدز متعرفش تعمل فريق؟! إيه الكلام ده؟ لو حضرتك من البداية شايف إنك مش هتقدر تحقق أي إنجاز وتقول أصلي بقالي ثلاث شهور فقط فبلاش توافق، ورحم الله امرأ عرف قدر نفسه، لكن نتريق على حسام حسن ونقول ناقصه مدرب؟ وتقول لازم تصريحاته تبقى منضبطة طيب ما أنت بتعمل نقيض الشيء دي تصريحات ؟ ".
وواصلت: "الكلام ده مش لكابتن حلمي طولان كمان للاعبين إما أن تمثل مصر وما تقلش منتخب تاني وتالت، وإما ماتروحش. ليه نتهزأ ونبقى حصالة المجموعة؟"
منظومة أربعة متخاصمين
وأكملت قائلة "محتاجين كرة القدم زي بقية الرياضات تحتاج إلى علم وإدارة وإرادة، محتاجة نخلص من "الشخصنة" يعني منجبش مدرب عشان يدي مدرب تاني كتف وهكذا و. لازم يبقى في أكاديميات للنشا تعمل صف أول وثاني وثالث، على الأقل نبقى شبه المنتخب الثالث في الأردن، مش هقول المغرب لأن ده صعب، وما طلبتش كتير ماحدث اليوم نتيجة طبيعية لمنظومة رياضية تدار بلا علم ."
واختتمت "عندنا منظومة كروية يقدها أربعة متخاصمين كابتن حلمي طولان وكابتن حسام حسن وأحمد دياب رئيس رابطة الأندية وهاني أبو ريده رئيس الاتحاد كل اتنين متصاحبين وعاوزين يدوا كتف للتاني منظومة غلط".