مشهد صغير قدر إنه ينزلني لسابع أرض.. شريف دسوقى يُعلن عودته بقوة للتمثيل

وجه الفنان شريف دسوقي رسالة لجمهوره، يخبرهم فيها أن المحنة التي مر بها خلال الأيام الماضية "بتر قدمه" لن تؤثر عليه، وأنها ستجعله شخصاً قوياً كما كان في الماضي، وأنها لن تمنعه عن إسعاد جمهوره، وذلك من خلال صفحته الشخصية على موقع التواصل الاجتماعي "فيسبوك".
كتب شريف دسوقي منشورًا قال فيه :"أنا المثال للشخص اللي ممكن تشوفه من وجهة نظرك منحوس، يوم ما الدنيا ابتسمتلى رفعت إيديها بكل قوتها ونزلت على وشى وفوقتنى من وهم السعادة اللى عيشتنى فيه".
وتابع شريف دسوقي قائلاً:"حلم حياتي أكون معروف ومشهور وموجود في وسط الحاجة اللي بحبها وبعد تعب وشقى سنين قدرت، قدرت أعمل كل اللى بحلم بيه، واخلى الناس كلها تشوفني في كل موقف بيقابلهم في حياتهم، قدرت اسببلهم سعادة بسيطة هى جزء رئيسي من طموحي، ربنا وهبلي القبول والناس حبتنى زي ماحبتهم".
وأضاف شريف دسوقي :" لكن مفيش حاجة بتدوم، وكل العجب إن الحاجة والسبب الرئيسي فى صعودك تكون هي الضربة القاضية اللي تنهى كل آمالك وتقضى عليك نفسياً، ابتديتها من تحت الصفر، طول عمرى بشقى وبتعب ومحدش حاسس بيا ولا حد واخد باله مني، مستني نص فرصة إني اثبت إني موهوب وموجود واد ثقة الناس اللى هتشوفني، سنين من عمري راحت وانا بجري من مكان لمكان ادور على دور ينصفني ويشيل الغيامة من على عيون كل اللى حواليا واثبتلهم اد إيه انا فنان كبير وتقيل اوى في مجالي".
وواصل شريف دسوقي كلامه قائلاً :" والفرصة جتلي، جتلي فى دور مكنتش اتوقع إنه ينجح ربع النجاح اللى وصله ، فضل ربنا كبير عليا ، خلانى محط أنظار الناس كلها بدور ممكن أي حد يأديه واللي حواليه ميحسوش بيه، الدنيا طبطبت عليا أوي بحب الناس ليا ونظراتهم وتقديرهم للنجاح اللي قدرت احققه، وبعد النجاح ده قررت إني اخد الدنيا بالأحضان واعمل أدوار وأدوار تتخلد في تاريخ السينما والناس تفتكرني بيها للابد
مكنتش اعرف إن طعنه الغدر هتيجي وسط الدور اللي كان سبب في قلب حياتي من ضلمة لنور، جرح صغير في رجلي وسط مشهد صغير قدر إنه ياخد البناية اللي بنيتها لسابع سما وينزل بيها لسابع أرض ".
واستطرد قائلاً:"متعودتش في حياتي إن المرض يهزمني، وعندي يقين من ربنا إن مفيش أي حاجة بتحصل في حياتي إلا وكان ليها سبب ومعنى ومغزى،وأكيد شايف إن ربنا شايلي الأحسن وإن اللي حصل ده خلاني اشوف حب اللي حواليا واهتمامهم وتقديرهم ليا رغم إني اللي قدمتوا ليهم قليل، واعتقد إن ده تصديقاً للقول، من احبه ربه ، حبب فيه خلقه".
واختتم شريف دسوقي كلامه قائلاً :"هرجع وهكون أشد وأقوى من الأول، هرجع وهشتغل ومش هخلى حياتي تقف أبداً على حاجة ، هحاول لحد آخر نفس فيا ، هرجع وعارف إن الناس اللي بتحبني في ضهرى ، هرجع علشان اسعدكم وعلشان اسيب جواكم ابتسامة وسعادة اتمنيتها ليكم طول حياتي".