بعد الإشادة بصداقته.. أمير طعيمة ل تركي آل الشيخ: "بحبك في الله يا ابن الأصول" (صورة)

أبدى الشاعر الغنائي أمير طعيمة، سعادته بصداقة سيادة المستشار تركي آل الشيخ رئيس الهيئة العامة للرياضة السعودية، مؤكدًا أنه من الشخصيات التي يفتخر بمعرفتها على المستوى الشخصي، وذلك ردًا على المنشور الذي كتبه الأخير عبر صفحته الرسمية على موقع التواصل الاجتماعي "فيسبوك" قال فيه: "عمرو دياب، أمير طعيمه، أيمن بهحت قمر، عمرو مصطفى مثال للأصدقاء الحقيقيين".

ورد "طعيمة" عبر حسابه الشخصي على موقع التواصل الاجتماعي "فيسبوك": "اللي هكتبه نفس اللي كتبه كل اللي يعرفوا الراجل ده عن قرب، و متوقع التعليقات اللي ما بتشوفش حاجة غير الجانب المادي و بتحمل قاذورات لن تمنعني من اني اقول شهادة حق في وقت فيه ناس كتير ما شافوش منه غير كل خير و يا اما بيهاجموه يا اما بيتداروا من الريح القوية و اكيد ما يشرفنيش أكون في اَي فصيل من دول، اولا: الحمد لله انا مستور ماديا و كل اللي عارفني يعرفوا كويس انا مين، ده غير ان هو راجل مسئول رياضي و شاعر، و اكيد مليش مصلحة في الاتنين".

وتابع: "انا قابلت الراجل ده في حياتي 3 مرات آخرهم من 8 شهور تقريبا، في وقت كان حابب يعمل استثمارات رهيبة في مجال الفن بجانب المجال الرياضي و لمست بإيدي قد ايه هو محب لمصر و معظم المقربين منه مصريين، شفت بعيني اللي بيستخدم ده بسوء نية و بيخطف و يجري و كم رهيب من الاستغلال و رغم كده فضل محب لمصر و شعبها و ده كان بيرضي غروري كمصري اكيد".

وأضاف: "انا شخصيا كان فيه أزمة كبيرة -غير مادية - لحد مقرب مني و ترددت اطلبه لأني عارف مشاغله، و لما كلمته تدخل و حلها و قابل الشخص ده بنفسه رغم ان كان ممكن ينهي المشكلة بتليفون و دي كانت رسالة انا فهمتها كويس، مع اني لا املك اَي شئ يحتاجه عشان يجاملني غير انه راجل جدع و بيحب يخدم الناس حتي لو ملوش اَي مصلحة من وراء الخدمة دي".

واختتم "طعيمة" رسالته لتركي قائلاً: "عزيزي المستشار تركي آلِ الشيخ في الوقت اللي كتير قوي أنكروا خيرك و وضعوك في موضع الجاني و انت المجني عليك انا عايز اقولك الف حمد لله علي سلامتك و كنت اتمني أكون جنبك في وقت مرضك بس انت عارف ان ما يمنعنيش عنك الا الشديد القوي و اني بحبك في الله يا راجل يا جدع يا ابن الاصول".