أمير طعيمة يخرج عن صمته ويُنصف إلياس الرحباني بعد تجاهله "العندليب الأسمر"

دافع الشاعر الغنائى أمير طعيمة، عن الملحن اللبناني إلياس الرحباني، بعد تهكمه على الفنان الراحل عبدالحليم حافظ، فى الحلقة الأخيرة من برنامج "ستار أكاديمي"، بعدما أشاد بمتسابق من البرنامج ووصفه بأنه أدى أغنية "سواح" من من مطربها الأصلي الذى لم يذكر اسمه على الهواء.

وكتب "طعيمة" عبر حسابه الشخصى على موقع التواصل الاجتماعى "فيسبوك" قائلاً:" فيما يخص الحملة اللي قام بيها البعض علي برنامج ستار أكاديمي و علي الأستاذ إلياس الرحباني و طبعا كانت فرصة ان البعض يعبر عن حبه الشديد لشخصي بين السطور:

1- جميع من علقوا ذكروا في تعليقهم ان أستاذ إلياس قال ان محمد سعد غني أفضل من عبد الحليم حافظ:

أولا: ده ما حصلش و ما إتقالش، اللي حصل ان أول حد علق قال كده و الباقي نقل منه و لم يكلف نفسه التدقيق في الفيديو او الرجوع له مرة آخري، كان الأهم ان الفرصة جت و هاتك يا هجوم.

2- لم أعلق في الحلقة و لم ألوم أستاذ إلياس بعدها لأن الموقف واضح جدا و الفيديو موجود و الراجل فعلا لثانية نسي و لم يتناسي او يقصد التهكم و تعامل بتلقائية و حسن نية و لم يقصد الإساءة، و هيلدا تداركت الموقف و ذكرته و لو انتظرت ثانية آخري بالتأكيد كان هيفتكر، و علي فكرة لما بتكون علي الهواء و هتعلق علي حد و كل تركيزك هتقول عنه ايه و هتحلله ازاي من الوارد جدا ان توجيه كل حواسك لفكرة معينة ينسيك ما سواها مهما كانت عظمة اللي نسيته.

3- بإستثناء أستاذ حلمي بكر اللي انتقد الموقف و لكن لم ينكر علي الرجل تاريخه، كل من علقوا علي الأمر أهانوا استاذ الياس اهانة شخصية مباشرة و قللوا من تاريخه الكبير، و عايز أقول ان من لحن لفيروز أعمال خالدة و غيرها هو أدري بقيمة و تاريخ الفنان الكبير عبد الحليم حافظ ممن علقوا عليه.

4- البعض تجاوزني و تجاوز استاذ إلياس الي النظرية المحببة عندنا كعرب و هي نظرية المؤامرة و ان ده مقصود و عنصرية من البرنامج: كل دول نسوا او تناسوا ان البرنامج عمل جايزة التوب وان في نفس الحلقة زيارة لشرم الشيخ لدعم مصر في محنتها الأخيرة، البرنامج اللي علي خطأ غير مقصود تم اتهامه بالعنصرية ضد المصريين ده هو نفس البرنامج اللي فاز بيه في اخر 3 نسخ مصريين في واقعة غير مسبوقة في تاريخ برامج المواهب، بس ليه يبقي عندنا عيون تشوف الحلو طالما عندنا فرصة نشوف الشيء السلبي او نخلقه من العدم و نحمل الموقف ما لم يحتمله.
5- أستاذ الياس الرحباني من أقرب الشخصيات الي قلبي في البرنامج و فنان محترم و بيعشق مصر و بيحترمها و بلمس ده في تعامله معايا انا شخصيا طول الوقت، و هو أطيب و أرق من إنه يكون بهذه الخباثة و أن يمرر اي اهانة لرمز مصري بقصد.

6- أصحاب نظرية المؤامرة: ما سألتوش نفسكم ايه اللي يخلي راجل عنده الخبرة دي في الحياة يقصد إنه يهين رمز من رموز مصر، هل هو قليل الخبرة لدرجة انه يعادي شعب بيمثل أكبر نسبة مشاهدة للبرنامج، إيه الفائدة الوحيدة اللي ممكن يجنيها من تصرف زي ده عشان يقصده.

7- بالرغم من حزني لما وصل ليه الحال الا اني سعيد جدا بإن البرنامج بيحظي بالمتابعة دي بالرغم من ان زمايلي الشعرا ء و الملحنين اللي علقوا علي الامر و بعضهم لمح لي بشكل مباشر او غير مباشر محدش فيهم بارك لي علي البرنامج الموسم الماضي او الحالي او حتي دعمني او تمني لي التوفيق، و بالأمانة ان البرنامج يكون بيتتابع من كل الناس أهم عندي من مجاملة واضح انها كانت هتكون مش من القلب.

8- و حطوا تحت دي ميت خط: أستاذ الياس مواليد سنة 1938 يعني أكبر من أبويا بسنة
9- ربنا بيتجاوز عننا الخطأ والنسيان و ما استكرهنا عليه، بس عبيده بيلاقوا دي فرصة حلوة يعبروا فيها عن نفسهم و عن المكنون بداخلهم، رغم ان الأصل في الفطرة الإنسانية هو أن نزن الأمور بحسن نية و نحسن الظن بالناس الا أن يثبت العكس.

10- عمرو مصطفي اللي ما بيفوتش نفس لحد، احتراما لوجودي في البرنامج ناقشني في الموضوع ده ع الانبوكس و اقتنع طبعا بحسن نية الراجل و ما حاولش يعمل بطل علي الفيس بوك و بشكره.

11- الأهم: صديقي محمد شبانة إبن أخو العندليب الراحل: أكيد لو كان فيه اهانة مقصودة لعبد الحليم حافظ لم أكن لأسمح بيها و انت عارف كويس اني في بداياتي كتبت أغنية لروح العندليب الراحل بدون أجر و انت غنيتها بصوتك، و دي الاغنية الوحيدة في تاريخي اللي كتبتها لشخص و انت عارف كويس حبي و تقديري لعبد الحليم حافظ اللي قيمته أكبر بكتير من هذا الهزل الجاري حاليا علي خطأ أقسم بالله غير مقصود بالمرة، و أي حد عنده حسن نية ما خدش باله من الموضوع اصلا.

و أخيرا: ربنا يدي كل واحد عل قد نيته.