م الآخر| إزاي ألاقي حبيبي؟

نورتوني في أول موضوع من مجموعة مقالاتي، اللي هتكلم معاكوا فيها عن الحب، بين الولد "سيد الرجالة"، والبنت "اللي تستاهل".
مبدئيًا أنا منظمة حفلات (ويدنج بلانر)، للي ميعرفنيش كويس، ولاقيت بدل مانا شغلي العملي كله منصب على المناسبات، طيب فيها إيه لو على السايت هنا، نتكلم في تفاصيل الحب والارتباط، وايه اللي نعمله؟، وإزاى نقرب؟ وليه نبعد؟، أرضيها إزاي وأرضيه إزاي؟، أعترفلها بحبي إزاي؟، طيب أول مرة أشوفها هل الهديه شخصية ولا ورد؟،.
هتكلم معاكوا في كل تفصيلة صغيرة وكبيرة في العلاقة بين أي ولد وبنت.. وعشان الرغي كتير بيصدع، خلونا ندخل في أول نقطة شايفة أنها مهمة، أول حاجه ننورها ونشوفها مع بعض.. ولاد وبنات كتير، بيكونوا محتاجين يحبوا، بس مش عارفين إزاي؟، ويعترفوا إمتى بحبهم؟، وهل ده هو الشخص المناسب، ولا دي مجرد ضربات قلب هتاخد وقتها وتسكت؟.. طيب، هل أكون صريح وأقول مشاعري؟، وأبقى جريئة واعترف؟.
بصي يا ست البنات، وإنت يا عم الشباب.. أولًا في حاجتين لازم نركز عليهم:
1- أشوف أنا محتاج إيه فى حبيبي أو شريك حياتي، كصفات، رغبات شخصية، طموحات.. أكتبها في ورقة بدءً بالأهم فالأقل أهمية.. يعني مثلًا:
- متدين
- طموح
- عملي
- متكلم
- طويل
- قمحي
اكتب كل المواصفات بالتفصيل في ورقة، وركز فيها داخليًا، بأنك بالفعل في الطريق لأنك تلاقيها.. غير كده، متطلبش شئ مش متوافر جزء منه فيك، يعني مينفعش أقول محتاجة شخص طويل وأنا طولي 152 مثلًا!!، لأن الطويل ممكن ميكونش عايز واحدة نفس طوله، بس حد قريب منه.. أكيد هيتعب أوي عشان يوطي وهو بيتكلم (هتجيبي للراجل أتب هههه).
متقولش أنا عايز بنوتة عاطفية وانا عقلاني ورزين ومنيم قلبي، لأن العاطفية محتاجة شوية "سينس"، وأحاسيس تشبع عواطفها، عشان تقدر تديك هي كمان عواطف.
2- لازم أتواجد في الأماكن اللي فيها الناس، اللي شبه اللي بدور عليهم، عايزة مذيع أقدم في إذاعة، واشتغل فيها إن شالله أوفيس بوي ههههه.. نفسي في بنت مثقفة، أروح مكتبات ومراكز شباب ومنتديات، أي مكان في ناس مثقفة والجو ده.. مينفعش تروحي معهد جوته وتحبي تتعلمي فرنساوي، لأن العنوان كده غلط!!.
وأهم شئ في كل مقالاتي عمومًا، دي نصيحة فعلًا أنا شخصيًا بطبقها في حياتي، مترسمش سعادتك الشخصية وطموحاتك على شخص معين، يعني متقولش إنت أو هي، أنا عايزة أتجوز عشان أعيش سعيد.. عايز أرتبط عشان أخرج وأتفسح وأتبسط، لأن زي ما إنت عايز تكون سعيد وتتفسح، شريكك بردوا بيدور على ده، فأنتوا الاتنين بتدور على نفس الحاجة، زي مسرحية المتزوجون، (قولي يا مسعود أنا عايز فلوس.. مسعود أنا عاوز فلوس.. خلاص نشوف حد يدينا أو يسلفنا!!)، هتبقوا إنتوا الاتنين، عايزين مصدر تالت للسعاده يديكوا!!.
دور على السعادة في رتم حياتك إنت، وإنتي دعبسي عليها في تفاصيل حياتك، وعيش سعيد وراضي من جواك، لأن في شئ مهم جدًا لازم نعترف بيه، كل الشخصيات الإيجابية المتفائلة بتتجمع مع بعض بشكل جاذب تلقائي، فلو إنت راحتك في إنك تروح النادي، هتقابلها في النادي وتكملوا انبساطكم على نفس الخط..
وافتكروا، إن الطيور على أشكالها تقع.. مفيش شخصية فنانة هتنجذب لشخصية معقدة!!.