مشجعان مصريان خطفا الأنظار من الجميع في مباراة التأهل إلى مونديال 2018 في روسيا، وتحديدا في لقاء مصر والكونغو الذي أقيم في ملعب برج العرب في الجولة الخامسة من تصفيات إفريقيا المؤهلة للمونديال والذي انتهى بفز الفراعنة 2-1 . لقطات الكاميرات خطفت أنظار مشجعا مصريا يقوم بحركة بهلوانية رائعة رغم أنه بقدم واحدة، إضافة إلى آخر ظهر باكيا من الفرحة في مشهد خطف قلوب الجميع .
الثنائي محمود عبده وحسني نصر أصبحا معروفين لدى الجماهير المصرية بعد التأهل لكأس العالم بعد غياب 28 عاما.
واستضاف "الفجر الرياضي" الثنائي ليجري معهما الجوار الذي جاءت تفاصيله كالتالي كما جاء على لسانهما:
تحدث حسني عن شعوره بعد التأهل للمونديال، حيث قال :" أنا مش مصدق نفسي أننا وصلنا كأس العالم، حاسس أننا بنحلم، كسبنا بدعاء المصريين كلهم وان شاء الله نفضل في انتصارات دايما".
أضاف حسني:" لحظة هدف الكونغو حسيت إني كنت في تايه وفجأة وقعت، حسيت إن حلم 28 سنة ضاع بس الحمدلله وصلنا لكأس العالم" .
من جانبه أكد محمود :" بداية أشكر جريدة الفجر على حسن الاستقبال، الحمدلله تأهلنا لكأس العالم 2018 وبإذن الله سصعد لكأس العالم 2022 بفضل الجمهور الكبير ودايما في انتصارات ونجاح" .
كواليس "البكاء والرقص" المؤثرة وحكاية محمود وحسني مع المدرجات
وعن كواليس بكاء حسني أشار كما جاء على لسانه :" 90 مليون كانوا بيعيطو في الاستاد بس سبحان الله اللقطة بتاعتي خطفت الأنظار، وكان في حد جنبي فرحان أنه طلع في التليفزيون وهو اللي خد باله وقالي إني طلعت في التليفزيون قلتله خلينا في الاحتفال".
حسني يواصل حديثه :" ماكنتش أعرف إن ظهرت في التليفزيون إلا من شخص تعرفت عليه بعد المباراة وعرفت إن ظهرت من تليفونه".
وعن قصته مع المباريات، تابع :" أنا زملكاوي صميم وبسافر مع الزمالك على طول بس مش بحضر المباريات بسبب منع الجماهير لكن حتى في المنع كنت بتعرف على أي ظابط يدخلني الماتشات".
حسني يحكي لحظة مؤثرة في اللقاء قائلا :" مش قادر أنسي لحظة سقوط محمد صلاح الوحيد اللي وقع واللي قام وفرقت معانا تشجيعه للجماهير ولما دخل فينا التعادل ربنا وقف معانا وفرح 90 مليون مصري أو 110 مليون لأننا زدنا ، قبل الماتش بساعتين كان فيه احتفال ومحدش زعلان من حد وكنا متوقعين أننا هنكسب كتير بس الحمدلله".
محمود أيضا تحدث عن كواليس الرقص وحكايته مع المباريات كما جاء على لسانه : أنا أهلاوي وصميم وبحضر المباريات والدليل لما ظهرت مع أبوتريكة في 2013 في لقاء الأهلي وأورلاندو وقالوا عليا الشاب من ذوي الاحتياجات الخاصة بيجري ورا أبوتريكة وأنا اللي فرحت مع منتخب بلادي وصورتي انتشرت بصورة رهيبة .. الألوان تختلف ويبقى لون مصر وأنا أهلاوي .. ورا الأهلي في أي مكان .. لو كان في إمكانية كنت هسافر تونس مع الأهلي أمام النجم أو الأهلي ماكنتش هتأخر عن النادي".
أضاف محمود :"بداية حضوري لبرج العرب الساعة الواحدة والنصف وفرحت لما لقيت إسلام محمد الأهلاوي القعيد زيي هو رمز البهجة ودايما في الاستاد ووجوده ع أرض الملعب يبعث لي التفاؤل وقلتله احنا هنكسب عشان أنت موجود وتفاعلنا مع الجمهور والجمهور كان فرحان بيا إزاي شاب من ذوي الاحتياجات بيرقص وخفيف زيي".
محمود يكشف تفاصيل "رقصه" مع ثنائي الأهلي ورسالة كهربا
محمود يواصل كشف تفاصيل الفرحة :" جريت ورا محمد صلاح اتخبط ووقعت على الأرض فقمت جريت تاني ووقعت وقمت ودخل صلاح أوضة اللبس وبدأت احتفالية مابيني وبين مؤمن زكريا هو رقص بالعكاز بيرقص من تحت وأنا من فوق وكهربا وسعد سمير رقصوا معايا وكهربا قالو ايه ده يالا ده".
سر صورة "محمود" التي خطفت الأنظار
يكمل محمود :"من هنا جت الصورة ولقيت كل اللي في الملعب بيفرح بطريقته وقلت ليه أنا مش يبقى ليا طريقة فرحة روحت عملت شقلباظ وجريت على أوضة اللبس عشان اللاعيبة وروحت وصحيت تاني يوم لقيت الصورة نزلت وانتشرت وبشكر المصور". الراقص بقدم واحدة يكشف رد فعله بعد تكريم "فيفا" محمود تحدث عن صورته التي اختارها الاتحاد الدولي لكرة القدم "فيفا " كرمز للإرادة :"تكريم الفيفا حافز كبير لذوي الاحتياجات الخاصة، اجتهد واشتغل وحاول أن تكون شخص ناجح في حياتك هي صورة ايجابية ودافع كبير لنا".
رسالة "الباكي والراقص" عن التعصب
تحدث محمود وحسني عن التعصب ووجهة نظرهما، حيث أن الأول "أهلاوي" والثاني "زملكاوي".
قال محمود :"لو الزمالك بيلاعب فريق في إفريقيا أو في بطولة مش فيها الأهلي هشجعه، لكن لو الأهلي بيلعب في بطولة فيها الزمالك هشجع الأهلي بس طبعا بس مش هتمنى الخسارة للزمالك".
أما حسني أكد :" التعصب مش أنك تكسر كراسي الاستاد إنت بتلعب باسم مصر، لأن الجماهير تقول فريق الأهلي المصري أو الزمالك المصري وربنا يوفق مصر" .
رأي محمود وحسني في انتخابات الأهلي والزمالك تحدث الثنائي عن الانتخابات في ناديي الأهلي والزمالك كالتالي
حسني :" صوتي للمستشار مرتضى منصور في انتخابات الزمالك، مرتضى منصور كلمني بعد الصورة ومنحني عضوية الزمالك وقال لبعض المشجعين خدوا حسني قدوة ليكو واعملو زيو لأنه بيحب البلد".
محمود :" أنا مش بحب الانتخابات، والمهندس محمود طاهر والكابتن محمود الخطيب محترمين جدا وأنا بحبهم هما الاتنين وأي حد يسمك النادي الأهلي هينجح لإن سياسة الأهلي لا تعتمد على شخص معين وأي حد فيها بينجح وربنا يولي من يصلح".
مفاجأة حسني "الزملكاوي" لجماهير الأهلي
فجر حسني مفاجأة في حواره حيث أشار إلى أنه سيحضر مباراة الأهلي والنجم الساحلي في إياب نصف نهائي دوري أبطال إفريقيا على ملعب برج العرب مشيرا :"ان شاء الله هروح ماتش الاهلي والنجم وهلبس تيشرت الزمالك".
رأي محمود وحسني في أزمة محمد أبوتريكة
تناول الثنائي الحديث عن أزمة نجم الأهلي ومنتخب مصر محمد أبوتريكة المتعلقة بإدراج اسمه ضمن قوائم الإرهاب.
محمود قال :" أبوتريكة أطيب خلق الله وأنا بحبه كإنسان ولاعب كرة قدم كأهلاوي ومصري وهو من الكوادر الجميلة، في 2013 جريت وحضنته، وبتمنى مشكلته تخلص ونفرح بيه ويرجع مصر".
حسني أشار :" كلنا بنحب أبوتريكة ونفسي أسمع صوته وبتابعه في الاستوديو التحليلي وكل الزملكاوية بيحبوه.. إن شاء الله تريكة مصري وهيفضل مصري ومشكلته هتتحل" .
محمد صلاح خليفة أبوتريكة! الراقص والباكي يوضحان
تحدث الثنائي عما إذا كان محمد صلاح نجم ليفربول الإنجليزي ومنتخب مصر خلفة محمد أبوتريكة.
قال حسني :" صلاح مش خليفة أبوتريكة، لكن أتذكر لقطة في تصفيات كأس العالم 2014 أبوتريكة قال لمحمد صلاح إنت صغير وبفتكر اللقطة دي لما خسرنا وماتأهلناش للمونديال، وصلاح عمل اللي أبوتريكة قاله عليه شال مسؤولية المنتخب وصلاح طلع قد المسؤولية ووصلنا كاس العالم".
محمود أشار :"مانقدرش نقول إن أبوتريكة زي صلاح .. الاتنين يعرفوا ربنا وبيصلوا بس تريكة رفض الاحتراف عشان الأهلي فهو لاعب محلي أخلاقه وشخصيته مخلياه أي مكان يروحه يتكرم فيه والناس كلها بتحبه وأنا مليش دعوة بالسياسة أنا بتكلم شخصيا أنا من عشاقه ومتعاطف مع تريكة زي الأهلاوية ..على عكس صلاح اللي احترف".
رأي محمود في تغريدة "أبوتريكة"
رد محمود على تغريدة محمد أبوتريكة بشأن المشاركة في كأس العالم مؤكدا :"أبوتريكة رد على الناس قالهم ماتنكروش مجهود صلاح وباقي اللاعيبة وتنسبهولي، تريكة محترم ونزل التويتاية ونفسنا نشوف أبوتريكة "أبو وش أستك يويو" في كأس العالم بس هيبقى إنكار للذات لصلاح وباقي المجموعة وتريكة أكيد نتمنى وجوده وهو ورانا وبيدعم المنتخب".
تحدث محمود وحسني عن سفرهما إلى روسيا لمساندة متخب مصر، قال محمود :"ان شاء الله هنروح كأس العالم 2018 في روسيا وجالنا دعوات أتمنى تحقيقها من الشخص اللي قالنا".
في نفس الوقت أشار حسني :" تلقينا دعوات من أحد الأشخاص يتحمل سفرنا لروسيا وإ شاء الله هنروح ونشجع مصر". "الراقص" يكشف تفاصيل حديثه مع "أبوهشيمة"
تحدث محمود عن تفاصيل حواره مع رجل الأعمال أحمد أبوهشيمة :" أنا وحسني ماروحناش لأبوهشيمة، احنا اللي طلبنا نقابله وهو مادناش أي فلوس بالعكس هو وافق على طلبنا واستقبلنا أحسن استقبال وهو رمز للاقتصادي والشاب الناجح في مصر وأشكر جريدة الفجر وكل من ساعدنا" .
حسني يتحدث عن اتفاقه على "البكاء"
تحدث حسني عن حقيقة اتفاقه مع أحد الأشخاص لالتقاط صورة له وهو باكيا، وأشار :" لقطة ان حد مصورني وكنت واخد بالي هسيب المعلومة للجمهور ولو كنت قاصدها مكانتش هتيجي زي ما عملتها وطلع عليا إشاعة إن كنت بعيط عشان متراهن على 100 ألف جنيه مع واحد صاحبي، بقى ده شكل واحد معاه 100 ألف وطلعه عليا أني مسيحي وطلع عليا إن جايب واحد يصورني وأنا معرفتش الا بعد الماتش واحد قالي مفاجأة وقالي في التليفون مبروك كسبت عمرة وبعدها تليفون من قريبتي هتطلع كأس العالم والإعلامي مدحت شلبي كان هيعمل معايا مداخلة، وفي كمين وقفني بعد العودة من الماتش الظابط قالي إنت طلعت وكنت بتعيط وعرفت إن الصورة اتشهرت".
"الراقص" ومجدي عبدالغني ومونديال 2022 في قطر محمود علق على فرص مصر في التأهل لكأس العالم 2022 المقرر إقامته في قطر، والسير على نهج مجدي عبدالغني نجم مصر وحديثه الدائم عن هدفه، وكذلك حديث محمود عن "الشقلباظ".
قال محمود :" إن شاء الله هوصل كأس العالم 2022 في قطر ومش هتكلم كتير عن الشقلباظ بتاعي زي ما كابتن مجدي بيتكلم عن هدفه، وهنروح نشجع منتخب مصر في قطر أو حتى إسرائيل".
